State a rorel lai ZPM party hruaitute chu nilaini khan Vanapa hall-ah meeting in, hetah hian an hruaitu nilai mekte term tawp tur chungchang an ngaihtuah a, inthlang lovin Val Upa Council (VUC) te kutah awm se an ti.
A nihna takah chuan rorel lai party hi an inthlang ngam lo ni berin a lang a, an vice president ni a, president mawhphurhna la mektu VL Zaithanzama chuan September thlaah hruaitu thlanna an neih tur thu hi lo sawi tawhin, chief minister leh minister te tan party president leh EOB nih theih a ni lo niin a lo sawi tawh bawk a ni.
Tunah an hruaitu rual kalkhawm chuan thiam takin VUC kuta hlan turin thutlukna an siam ta a, anni hian tute emaw finchhuahna hmangin an mi duhzawngte an rem leh ngei ang a, an party hian hruaitu tha tak, CM leh Minister tute emawin an duh anga an tihkawi ngam tur an thlang chhuak thei ngei turah ngai teh ang.
ZPM party hi pawl leh party hrang hrang kalkhawm a luangza an nih avangin an hruaitu thlan/ruat turah pawh hian inhruipawhna nasa tak a awm ngeiin a rinawm a, mipui tam zawk chuan kan beisei leh rin ang ngeiin an lo inruat chhuak ngeiin a rinawm bawk a ni.
Engpawhnise, September 29 hian General Assembly an nei dawn a, chutah chuan engkim a chiang hman tawh turah ngai ila, a hma lam pawhin kan lo hre tawh mai thei bawk e!