Mizoram Weightlifting Association (MWLA)-in kum 50 an tlin, Golden Jubilee lawmna neih ruala 21st Senior Men & Women, 16th Junior Men & Women leh 7th Youth Boys & Girls State Level Weightlifting Championships-ah Jeremy Lalrinnunga chuan snatch-ah Mizoram record thar siamin Best Lifter (Men)-ah thlan zui a ni a. Pricilla Biakremmawii chu huang chi thumah Best Lifter a ni bawk.
Jeremy-a hian Senior Men (75kg) inelnaah kg 140-a rit chawiin nikuma Bungzung tlangval, Lalruatfela’n kg 136 chawia Mizoram record a siam chu a khum a. Ainawn Veng tlangval hian clean & jerk-ah kg 160 chawi bawkin gold medal a la.
Mizoram State Sports Council (MSSC) Weightlifting Academy-a awm mek, Pricilla-i hi senior, junior leh youth-ah best lifter atan thlan vek a ni a. Kg 57 huangah inlanin junior, youth leh senior-ah hian gold medal a la vek a ni.
Golden Jubilee lawmna pual inelnaah hian India Weightlifting Federation (IWFA)-in international player0te pawh services championship leh state level championships an te lo a nih chuan national championship-a an tel a phal tawh loh avangin phai lamah army leh National Centre of Excellence (NCOE)-a Mizo lifter-te pawh an tel deuh vek a, inhliam vanga inlan thei lo erawh an awm bawk.
MWLA hian March 15 – 31, 2027 chhunga Meghalaya-in National Games a thlen turah rit chawi bik a thleng dawn a. Sorkar pawhin he games-a medal la thei tura beisei awm lifter pangate chu a theih ang angin a tanpui mek.
Tun tum inelnaah hian MWLA hruaitu hlui thi tawh chhungten medal leh trophy an tumsak a. Rozingi (Zoliana Royte, president hmasa ber)-te chhungten youth, junior leh senior an tumsak a. Senior (men & women) trophy chu Thangluaii (C.Rothianga, president hlui)-te chhungkuain an tumsak bawk.
Junior (men & women) trophy chu Hrangthanpuia (Dr. Lalmuanpuia, treasurer)-te chhungkhuain an tumsak a. Youth boys & girls chu Teresa Lalrindiki (K.Thanzauva, treasurer leh gen. secretary hlui)-te chhungin an tumsak.
Best Lifter youth, junior & senior tana trophy pawh Vannuni (K.Lalrammawia)-te chhungin an tumsak a. Inelna hi Apex Bank, LESDE, Women & Child Development, LAD, Aizawl DC, SYS leh MSSC ten an sponsor bawk a, MWLA-in lawmthu an sawi.
- Senior Men:
Team champion – MSSC Weightlifting Academy
Runner’s Up – Khelo India State Centre of Excellence (KISCE) - Senior Women:
Team Champion – Khelo India State Centre of Excellence (KISCE)
Runner’s up – Sports Authority of India (SAI) - Junior Men:
Team Champion – MSSC Weightlifting Academy
Runner’s up – Khelo India State Centre of Excellence - Junior Women:
Team Champion – Khelo India State Centre of Excellence (KISCE)
Runner’s Up – Lunglei Weightlifting - Youth Boys:
Team Champion – MSSC Weightlifting Academy
Runner’s Up – Khelo India State Centre of Excellence (KISCE) - Youth Girls:
Team Champion – Khelo India State Centre of Excellence (KISCE)
Runner’s up – MSSC Weightlifting Academy
Best Lifter:
Senior Men – Jeremy Lalrinnunga (Ainawn)
Senior Women – Precilla Biakremmawii (MSSC)
Junior Men – Isak Malsawmtluanga (MSSC)
Junior Women – Precilla Biakremmawii
Youth Boys – Laithanpuia (MSSC)
Youth Girls – Precilla Biakremmawii (MSSC)