Hun eng emaw chen intihsiakna neih a nih hnuah, Central YMA buatsaih Inter-Branch YMA band contest hmasa berah Ramhlun North Branch YMA chu pakhatna an ni.
LBS Suzuki 1st Inter Branch YMA Band Contest-ah hian YMA branch 50 an tel a, heng zinga branch pahnih hi Aizawl khawpui pawn an ni.
He band contest-ah hian judge pathum — Rinzauva, Hmingpuia leh Lalhmachhuana Hauhnar te’n uluk takin an endik hnuah, Ramhlun North Branch YMA band te chu pakhatnaah an puang a ni.
He band contest-ah Chief Judge Rinzauva chuan, “Central YMA in endik turin min sawm a kan huphurh a, zahna avangin kan pawm a, thiam ang tawka ulukin, international standard in, a hmunah leh video-ah kan endik a, a harsa a, thutlukna te kan siam a, a tawpah kan siam fel a, lawm taka min pawmsak kan beisei a ni,” a ti.
LBS Suzuki 1st Inter Branch YMA Band Contest-a pakhatna, Ramhlun North YMA Branch hian lawmmanah Rs nuai 1 an dawng a. Pahnihna Zarkawt Branch YMA band in Rs 70,000 an dawng a, pathumna Ramhlun South branch YMA band in Rs 50,000 an dawng thung.
He band contest-ah hian pangana an awm lo va, pali-na pahnih awmin chungte chu – Dawrpui Vengthar branch leh Chanmari branch YMA te an ni.
- Mi mal chawimawina sem a ni bawk a. Chungte chu :
Best Vocalist : Vanlalhriati Sailo, Chanmari
Best Guitarist : Lalfakawma Renthlei, Chanmari West
Best Bassist : C. Lalruatfela, Ramhlun South
Best Traditional Musician : Zonuntluanga Vanchhawng, Chaltlang
Best Keyboardist : Lalrinzauva Khiangte, Dawrpui Vengthar
Best Drummer : Vanlalmalsawmkima, Ramhlun North