Nepal-Tibet ramria sabereka khuangkaih thleng avanga thi chu mi 700 chuang ni tawhin mi 2,400 vel chin hriat lohvin an la awm mek bawk.
Nepal-a National Disaster Risk Reduction & Management Authority chuan thil tam tak tichhiain chenna in sang tel luah theih loh a ni tih a sawi.
Chinese sorkar chanchinbu chuan Tibet-ah mi 16 vel thi an awm tawh a, mi 546 chin hriat loh an la awm niin a tar lang ve bawk.
Nilainia sabereka khuangkaih thleng hian ram pahnih inrina bawka khuate hnawlin kawngpui leh chenna inte a la a, a chhe nasa hle tih tual chhung thuneituten an sawi.
Chhanchhuah hna thawktute chuan tui lian thleng leh thei a la awm tih sawi awm karah dam chhuakte zawn hna chu Pathianni pawh khan an la thawk chhunzawm a, hun a liam tam deuh tawh avangin beisei a sang lo tan hle.
Chhiatna thlenga thi leh chin hriat loh zat chiah hi hriat chian vek theih a la ni lo.
Pathianni thleng khan mi 734 vel thi awm tawhin chin hriat loh 2,498 an la awm niin an ram disaster agency chuan a sawi.
Sorkar chuan tui a len hnuah ram dang mi 261 chuang biakpawh theih an la ni lo tih a sawi.
China-a CCTV-in thi leh chin hriat loh zat puan chu a dik em tih finfiah theih a ni lo va, Nepal-a mite nen chhiar pawlh a ni em tih pawh hriat theih a ni lo.
Kum 1950 chho atanga China-in a awp, Tibet hi inkhuahkhirhna kalpui nasatna ram a ni a. Ram dang chanchinbu mi tan luh theih loh tluk niin tual chhung mite biakpawh pawh thil khirh tak a ni bawk.
Nepal Army thupuangtu, Brigadier General Rajaram Basnet-a chuan chhiatna thlenna hmunah hian ruah a sur a, khaw awm dan a inthlak thut thut reng avangin chhanchhuah hna thawh chu a khirh hle tih a sawi.
Nepal chuan chin hriat lohte zawn hmuh leh chhawmdawlna pek chu an ngaih pawimawh hmasak ber a ni rih tih Inrinni khan Foreign Minister Shisir Khanal-a’n a sawi a, mi 4,450 chuang chhanchhuah an ni tawh tih a sawi.
Thuneitute chuan chin hriat lohte finfiah nan an chhungte biakpawh hna a thawk a, ram dang mite pawh an palaite kaltlangin zawn hna thawh zel a ni tih a sawi.
Tui lian dang thleng leh thei a ni tih sawi awm pawh an ngaihven reng a, ‘inring rengin’ hma an la zel tih a sawi.
Prime Minister Balendra Shah-a pisa chuan Zirtawpni khan chhanchhuah hna rang zawnga thawh a nih theih nan thawktu tirh belh an nih thu a sawi a, hei hian beiseina pawh a siam.
Chinese sorkar news agency Xinhua chuan Zirtawpni vek khan Chinese President Xi Jinping-a’n thutkhawm kovin chhanchhuah hna thawh mek zel leh hmalak zel dan tur an sawiho niin a tar lang.
Chhiatna thlen bika UN secretary general palai, Kamal Kishore-a chuan ram dangte chu chhawmdawlna leh hmalak mekna pui tura che chhuak turin a ngensak.
US chuan tui lian tuarte tanpui nan $5,00,000 an pek tur thu a lo sawi tawh a, UK pawhin £ maktaduai 5 a pe dawn.
Hetih lai hian a thenawm, India chuan Indian Air Force (IAF) bungraw phur thlawhna hmangin chhawmdawlna thil chi hrang hrang vawi li a phur lut tawh bawk.