Aizawl: Mizo Zirlai Pawl (MZP) rorelna sang ber dawttu, Federal Council vawi 61-na chuan ECI-in Special Intensive Revision (SIR) a kalpui mekah Chakma punna leh Mizoram-a central institution-te fel lo taka hna lak tumna a en zui reng dawn tih a puang.
Thawhtanni khan MZP Conference Hall-ah he Federal Council hi neih a ni a, Vice President Sanghmingthanga’n a kaihruai a. House Leader, MZP President Dr. C. Lalremruata chuan house address neiin, SIR 2005–2026 Electoral Roll inkara Chakma punna chu ngun taka zirchiangin final roll chhuah thleng an en zui tur thu leh, NIT Mizoram Registrar lak tur advertisement thlengin fel lo tak a awm loh nan an vil zel dawn tih a sawi.
Federal Council palai 52 telna thutkhawm hian September 23-25, 2026 chhunga Darlawn khuaa MZP Assembly awm tura chhawp chhuah tur, ram leh hnam bakah zirna kaihhnawih agenda hrang hrang 11 a pawm bawk.
Zirna lamah sorkar college-te bus mamawhna te, Mizoram-a CBT Exam Centre dah belh chungchangah te, zirlaibu-a Mizo tawng dik leh Mizo hnam hrang hrang chanchin telh te, leh career/drugs awareness campaign buatsaih chungchangte a tel a ni.
Ram leh hnam humhalhna lamah Kaladan Project zirchianna te, ramri humhalh te, Mizoram luhka hmun hrang hrangah mi tupawh ILP check an nih theih nan te, Mizo hming hawha hnamdang sumdawnna khap te, leh Mizo Marriage & Inheritance of Property (Amendment) Act, 2026 khauh taka kengkawha hnam dang thlahten ST chanvo an chuh loh tura hmalakte chu agenda pawimawh atan an pawm a ni.