Aizawl: Aizawl East II MLA B. Lalchhanzova chuan Inrinni zingkar khan a bial chhung, Dawrpui leh Chhinga Vengah infiamna leh taksa sawizawina hmanrua hrang hrang a hlan.
Information & Public Relations (I&PR) Minister ni bawk B. Lalchhanzova hian Dawrpui Badminton Club hnenah Power Generator (6.5 KVA) a hlan a, Chhinga Veng Table Tennis Club hnenah Table Tennis Board leh Carpet a hlan bawk.
Thilpek hlanna inkhawm tawiah Minister chuan thalaite leh upa zawkte tana taksa sawizawina hmun leh hmanrua ngaihtuah nachang vengchhung club-ten an hria chu lawmawm a tih thu a sawi a. State, National leh International Level an tinzawn phak lo a nih pawhin tualchhung intihhlimna hrim hrim pawh a hlu a ni tiin, infiamna leh taksa sawizawina hian taksa hriselna mai bakah thalaite nunkawng tha zawka hruaina atan hmanrua pawimawh tak a nih avangin tangkai taka hmang tura a beisei thu a sawi.
B. Lalchhanzova hian Zirtawpni khan Chhinga Vengah Public Interview neiin, mipuite harsatna leh mamawhte a lo ngaihthlaksak a. Aizawl East II Block ZPM chuan a bial mipuite ngaihsak em em tu MLA an nei chu lawmawm an tih thu sawiin, ram leh bial tana a inpeknate an chhuan tak zet thu an sawi a ni.