Aizawl: New Delhi-a Vigyan Bhawan-ah Inrinni khan Govt. Lunglei Electric Veng High School Headmistress, Lalnunmawii chuan President Droupadi Murmu kut atangin ram chhunga zirtirtu tha chawimawina sang, ‘National Teachers’ Award’ a dawng.
He chawimawina hi Certificate, Silver Medal leh Rs 50,000 te a ni.
Kumin hian ram chhung atangin chawimawina dawng tur hian Department of School Education and Literacy hnuaia zirtirtu 48, Higher Education leh Polytechnic-a zirtirtu 21, leh Ministry of Skill Development & Entrepreneurship hnuaia trainer 13, zirtirtu leh trainer 82 thlan chhuah an ni a. An zingah hian Mizoram aiawhin Lalnunmawii hi a tel a ni.
National Teacher Award dawngtu Lalnunmawii hi kum 2011 khan Contract Maths Teacher-in a thawk tan a, Govt. Leitlangpui High School-ah hun rei tak a thawh hnuin kum 2017-ah regular-a lak a ni. Kum 2022 tawp lamah LDE exam-in, February 2023 atang khan Govt. Electric Veng High School, Lunglei-ah Headmistress hna hi a chelh tan a ni.