Aizawl: Assembly Speaker leh Chalfilh Bialtu MLA Lalbiakzama chuan Inrinni khan Sesawng Volleyball Court thar a hawng a; leimin avanga in chhiate tlawhin tanpuina a hlan nghal bawk.
Volleyball Court hawnna puala inkhawmah Lalbiakzama chuan court thar hi thalaite’n nun hrisel leh tha zawk an neih pui theihna tur hmun pawimawh a nih a duh thu a sawi a. Court thar la tihphuisuina tur tul hrang hrang — a hungna siam, light system vuah leh a kotlang tinghettu tur retaining wall te pawh ngaihtuah zui zel a tum thu a sawi bawk.
Sesawng Volleyball Court hmun hi Sesawng Village Council (VC)-te pek a ni a. Sorkar puihnain volleyball court puitling tura siam a ni. Hna tluang taka zawh fel a nih hnuah leiminin gallery a hnawl chhiat leh avangin a bul atanga thar thawh leh ngai a ni a. Tunah hian gallery chung nei, infiammite inthlakna bakah substitute leh team management-te thutna siam vek a ni tawh a ni.
Inrinni vek khan Speaker Lalbiakzama hian Sesawng khuaa leiminin a tihchhiat, Laltanpuia (L) leh Khawpuithara-te in chu a hmunah tlawhin, inchung tur rangva tanpuina a hlan nghal bawk.