Aizawl: Tun hnai ruah sur nasa avanga rel kawng a chhiat avangin Mizoram chhungah bungraw chawk luh hrang hrangah khaihlak a awm avanga buhfai tlachham tur anga mipuite thlaphanna a awm loh nan Food, Civil Supplies & Consumer Affairs Department chuan mipui hriattirna tichhuakin, Mizoram chhungah buhfai khawl a tam tawk thu an tar lang.
Supply Department thu chhuah tarlan danin, tun dinhmunah Mizoram chhunga Food Corporation of India (FCI) kudam hrang hrangah buhfai quintal 1,95,345.10 leh Mizoram sorkar Supply kudam hrang hrangah buhfai quintal 1,34,430.93, an vaiin buhfai quintal 3,29,776.03 a awm mek a ni.
Supply Department-in thla khata ration buhfai a sem chhuah thin hi quintal 97,000 vel a nih avangin tuna buhfai khawl sa hian thla thum mamawh aia tam a daih tawk a ni.
Rel kawng chhiat avanga bungrua lak luhna kawngah harsatna engemaw awm mah se, mipuite tana buhfai chungchangah thlaphanna tur engmah a awm loh thu Supply Department chuan an tar lang.