Aizawl: Ram chhunga kum tina a hman thin, mamawhtute hnena a thlawna mit pek leh hemi chungchanga inzirtirna ni ‘Eye Donation Fortnight’ vawi 41-na chu Thawhtanni khan Taxation Department Auditorium, MINECO-ah hman a ni a. He huna tar lan a nih danin Mizoramah thih hnua mit pe (pledge) tura inziak lut zat chu mi 9,345 an tling tawh.
National Programme for Blindness & Visual Impairment (NHM) bultumin hun hman hi National Health Mission (NHM) Director Dr. R. Lalchhuanawma’n a kaihruai a. A tar lan danin, Civil Hospital Aizawl-a Mizoram Eye Bank (July 31, 2008-a din) hnuaiah August 27, 2026 thlengin thih hnua mit pe (donate) tum inziak lut tawh mi 9,312 an awm tawh a. Mit dawng tur mit thlak ngai inziak lut hi mi 400 an awm tawh a. Tun thleng hian thih hnua mit pe tawh hi mi 632 (mit darthlalang (cornea) – 1,456) an ni.
Kumin National Fortnight on Eye Donation hun chhunga mit donate phal, pledge chhang zawng zawng nen chuan mi 9,345 (9312+33) an awm tawh a. Mit donate, pledge chhang duh hi mi 20 chin an awm chuan a hmunah thawktu ten an pan thei reng a ni.
Mit thlak ngai inziak lut mi 400 zinga mi 99-te chu Civil Hospital, Aizawl-ah hlawhtling taka mit thlak sak an nih tawh a. Koh nghak mek hi mi eng emaw zat an awm bawk.
Synod Hospital, Durtlang hi Eye Donation Centre niin, mit thlak ngaite pawh an thlak thei tawh a, an thlak nual tawh bawk. Eye Care Hospital-ah pawh mit thlak thin a ni a, hemi bakah hian cornea hi SSN, Guwahati-ah thawn thin niin Mizoram atangin a hmangtu tur ten an pan mai thin bawk.
He hun hmang tura sawm Govt. Higher Secondary School leh MICE school naupangte atangin mit donate tum mi 33 te an inziak lut thar bawk.