Aizawl: Mizoram Upa Pawl (MUP), Zarkawt Branch chuan Thawhtanni khan an pawl din kum 50-na (Golden Jubilee) an lawm a. Bialtu MLA, UD & PA Minister K. Sapdanga chuan hmanpuiin MUP chu pawl satliah mai ni lovin ram, hnam leh sakhaw innghahna pawimawh tak a nih thu leh rual ute chu hnam tana ‘Human Library’ leh finna hnar an nih thu a sawi.
Minister K. Sapdanga chuan kum 1976-a MUP Zarkawt Branch lo dintute ngaihtuahna leh hmathlir thui tak neitu, tangtharte leh veng tana hmathlir thui tak neitute chu an chawimawi a, zahna hlan chungin an sulhnu an chhui zel dawn tih a sawi.
Mihring dam chhung atan kum 50 hi hun chanve tling hial a nih avangin lawmna chhinchhiah tlak a nih thu sawiin K Sapdanga chuan, kum 50 a ral leh hunah pawh thangtharten he pawl hi chhunzawm zelin tuna Jubilee meichher chhitute sulhnu hi an la hlut chhunzawm zel dawn tih a sawi a. He hunah hian khawtlang leh hnam tana rual u te pawimawhna hrang hrang sawiin, MUP Zarkawt Branch te chu Golden Jubilee duhsakna sang ber a hlan nghal a ni.
Minister chuan Mizo hnam nunze mawi ‘Aia Upa Zah’ chungchang sawiin, tun hnaia a tlahniam anga sawi a awm thin chu chhungkaw inzirna dawng mumal lo mi tlem te vang a nih thu leh a nawlpui erawh chuan an hlut reng thu a sawi a. MUP hi veng chhung leh khawtlanga buaina hrang hrang vengtu leh thelhtu an nih avangin zah an phur thin tih a sawi a. Welfare ngaihtuah reng rualin khawtlang mawhphurhna te hlen chhunzawm zel turin a chah a ni.