Aizawl: Gauhati High Court-in NDPS thubuai tihtawpsakin Lalrosanga thiam a chantir.
Special Judge (NDPS Court), Champhai-in ruihhlo man thubuaia kum 10 lung in tang tur leh Rs. 1,00,000 chawi tura hremna a lo pek tawh Lalrosanga chu Gauhati High Court chuan thiam chantirin a thutlukna a lo siam tawh chu a tihtawpsak a. Justice Kaushik Goswami chuan thiam loh a lo chantirna hi dan kalh a ni tih hmuin, Lalrosanga hi a rang lama chhuah zalen a nih ngei nan Release Order chhuah nghal turin High Court Registry a hrilh.
He thubuai hi April 26, 2023-a Tuisenphai Check Gate-a Police duty-ten Hyundai i20 car atanga heroin gram 894.18 (sahbawn bawm 80 chuang) an man atanga intan a ni a. Police-ten thubuai an thehlut a, NDPS Court Champhai chuan NDPS Act Section 21(c) leh 25 hnuaiah Lalrosanga chu thiam loh chantirin kum 10 lung in tang tur leh Rs. 1,00,000 chawi turin a lo hrem a ni. Amaherawhchu, Lalrosanga hian he thutlukna hi pawm loin Gauhati High Court-ah appeal a thehlut zui ta a ni.
High court-a thubuai ngaihtuah a nih lai hian finfiahna leh thu hretute (witnesses) tan chhan chu a chak tawk lo hle tih hmuh a ni. NDPS Act hnuaia dan zawm ngei ngei tur, a bik takin Section 52A hnuaia thil tih tur te chu zawm a ni lo va, ruihhlo mannaa independent witness leh Investigating Officer (IO) te ngei pawhin Lalrosanga’n motor-a ruihhlo a dah lai an hmuh loh thu an sawi. Motor check gate a paltlang lai hian ruihhlo chu motor chhungah a awm lo tih IO chuan a pawm bawk a ni.
Puhna lian tak awm zui ta chu, Prosecution lamin Section 313 CrPC hnuaiah Lalrosanga hi insawifiahna hun buatsaihsak lovin zawhna an zawt lo tih high court chuan a tar lang a. High court chuan motor-a a chuan pui avang maia ruihhlo neitu a ni e ti a trial court-in a lo pawm ringawt chu finfiahna tling tawk lo a ni tiin a chhal thla a, rinhlelhna awm miah loin prosecution lamin puhna hi an finfiah loh avangin Lalrosanga hi thiam chantirin chhuah zalen a ni ta tih thu lakna JC Lalnunsanga website chuan a tar lang.