US Central Command (Centcom) chuan Tehran-in American indo lawng vawi hnih an kah chhan let nan US sipaiten Iranian tuialhthei phur panga an kap a, pakhat a pil tih a sawi.
Iran’s Revolutionary Guards Corps (IRGC) nena inzawmna nei Iranian tuialhthei phur lawng pali chu Gulf of Oman-ah kah an ni a, Iran vaukama oil terminal lian awmna, Kharg Island bulah pakhat beih a ni bawk tih Centcom chuan a sawi.
Tehran chuan missile hmanga Jordan-a US tanhmun a kap veleh nghal a, a tam zawk erawh an lo kah thlaksak nia sawi a ni a. Strait of Hormuz-ah US lawng pahnih leh tuialhthei phur pariat beih tawh a ni.
US leh Israel tang dunin February 28 atanga Iran an kah tan hnuah thla ruk a liam tawh a, chawlhkar khat liam ta chhungin ram pahnihte hi an inkap tawn nasa hle bawk.
Jordan chuan Iranian missile 20 zinga 18 an lo kap thla a, pahnih pawh hi mihring chen lohna laiah a tla niin Jordanian Armed Forces thupuangtuin a sawi.
An chhan let tur thu an sawi hnuah Iran-a Revolutionary Guards chuan Nilaini khan US lawng pahnih, tuialhthei phur pariat leh Strait of Hormuz paltlang tum ‘eng lawng nge hriat loh’ 10 an kap tih sorkar chanchinbuin a tar lang.
Tun tum inkahna hi Iran-in ballistic missile hmanga US indo lawng pahnih a kah atanga intan a ni a, Centcom chuan kahna hi ‘hlawhtling taka lo dan’ niin a sawi a. American sipai tuartu an awm lo niin a sawi.
US hian a chhan let nan Iranian tuialhthei phur lawng pang, ‘IRGC leh an thawhpuiten hrek ni chunga dollar tluklehdingawn tel sumdawnna an kalpui’ atana an hman an kap ve nghal tih a sawi.
Lawng kah zinga pakhat, M/T Riesco chu Gulf of Oman-ah a pil niin Centcom chuan a hnuah a sawi a, a video pawh X-ah a tar lang.
Lawng pakhat beihna, Kharg Island hi Iran-in tuialhthei a thawn chhuahnaa terminal lian ber pakhat a ni a. Thlitfim loh tuialhthei an thawn chhuah zinga 90% vel chu Gulf-a terminal kaltlang a ni a, ram laili atangin pipe hmangin an luhtir thin a ni.
Thawhlehni khan Yemen-a Iran-in a thlawp Houthi movement chuan Saudi Arabia-a energy leh civil mite hmun an bei a, mi 73-in hliam an tuar niin Saudi thuneituten an sawi.
Drone leh missile hmanga tuialhthei hmun leh thil dang beih a nih avangin hna pawh thawh theih loh a nih thu Saudi Arabia-a sipai leh energy ministry chuan a sawi.