Aizawl: LESDE Minister Lalnghinglova Hmar-in Mizorama Employees’ State Insurance Corporation (ESIC) hospital din tura a ngen angin Union Labour Minister Dr Mansukh Mandavija-a’n Mizoram chu ESIC hospital pek tum a nih thu a sawi.
New Delhi-a cham mek, Lalnghinglova Hmar hian Thawhlehni khan Union Labour & Sports Minister, Dr. Mansukh Mandaviya chu a chenna inah a kawm a, an inkawmnaah hian Mizoramah labour-te hamthatna tur zawnga sorkar laipui rawtna chak taka bawhzui a nih mek dan te, Mizoram Building & Other Construction Workers Welfare Board-a inziak lut an pun chak dan leh an hamthatna tura ruahmanna thar siam a nih dante Union Labour Minister chu a hrilh a ni.
Tun hnaiah nasa takin ESIC hnuaiah registration a pun thu leh hmuh theiha hmasawnna a awm thu hrilhin, mihring cheng an tlem avangin ESIC Hospital din tura tehnaah Mizoram tan tlin a harsa a, a mihring inziak lutin an tlin chiah lo chungin an hmasawnna enin ESIC Hospital din dan a ngaihtuahsak turin a ngen a ni.
Union labour minister chuan, LESDE minister ngenna chu tihhlawhtlin a tum thu leh ESIC thutkhawm awm leh hunah hospital pek tum a nih thuin a lo chhang a, Mizorama labour welfare chungchanga hmalakna leh hmasawnna chu Delhi atanga an lo hriat thute a sawi a ni