Aizawl: Disaster Management and Rehabilitation (DM&R) Minister Prof. Lalnilawma chuan tun hnaia ruahsur nasa avanga Mizoram hmun hrang hrangah lei min leh kawng ping zawnga chhiatna thleng mekah mipuite chi-ai lo tur leh harsatna tawkte chu thuneitute hnena thlen thuai thin turin a ngen.
Nilainia video kaltlanga thuchah tichhuakin minister chuan, hmun hrang hranga lei min leh kawng ping awm te tanpui turin khua leh veng tinah Zonal Officer-te, Local/Village Level Disaster Management Committee te leh DC-te kaihhruaina hnuaia committee hrang hrang din vek an nih thu sawiin, heng thuneitute hnenah hian harsatna tawk ten rang taka report thin turin a chah.
DM&R Department-in smart phone application an siam ‘Khuarel App’ hmanga kawng ping leh leimin te report vat thin turin mipuite a chah a, hei hian Zonal Officer leh DC-te hnena thlen vat a, hmalakna a tihchaktir theih tur thu a sawi a. DM&R Department te chu engtik lai pawha koh theih reng a an awm thu a sawi bawk.
PHE Department changtu ni bawk Prof. Lalnilawma chuan tui sem kawnga harsatna thleng mek chungchang pawh sawifiahin, Aizawl Greater Water Supply Scheme Phase III chu leiminin a hnawh pin avangin tui pump theih a rih loh thu leh Setlak lam atanga gravity hmanga tui lak thin pawh Western By-pass road siamna leivung avangin a nu bawk si a, PHE lam ten harsatna an tawh mek avangin tui harsatna awm thei chungchangah mipui hriatthiamna a ngen nghal bawk a ni.