New Delhi chu Inrinni leh Pathiannia 18th BRICS Leaders’ Summit thleng turin a inbuatsaih mek a. Prime Minister Narendra Modi-a’n BRICS huang zauh mek zel leh an thawhpui ram hruaitute dawngsawngin a mikhual dawn.
Hruaitute intawh khawmna pui ber hi Inrinniah tur niin BRICS member ram 11 an hruaitute an tel dawn a. An thawhpui ram leh an sawm bik hruaituten Pathianni hian an zawm ve dawn a ni.
Kumin hi India-in BRICS a kaihhruai kum a ni a. Summit hi Bharat Mandapam-a nghah niin sumdawnna, investment, energy leh ei tur, mamawh inpekna, khawvel huapa sorkarna leh thil dang dang an sawiho dawn a ni.
BRICS-ah hian full member 11 – Brazil, Russia, India, China, South Africa, Egypt, Ethiopia, Indonesia, Iran, Saudi Arabia leh United Arab Emirates an awm.
Tun thlenga tel tur chiangte chu Chinese President Xi Jinping, Russian President Vladimir Putin, South Africa President Cyril Ramaphosa, Iranian President Masoud Pezeshkian, Egyptian President Abdel Fattah el-Sisi, Ethiopian Prime Minister Abiy Ahmed, Indonesian President Prabowo Subianto, UAE Crown Prince Sheikh Khaled bin Mohamed bin Zayed Al Nahyan leh Brazilian Foreign Minister Mauro Vieira te an ni.
BRICS thawhpui leh an sawm bik atangin Belarussian President Alexander Lukashenko, Kazakhs President Kassym-Jomart Tokayev, Malaysian Prime Minister Anwar Ibrahim, Thai Prime Minister Anutin Charnvirakul, Cuban President Miguel Díaz-Canel Nigerian President Bola Ahmed Tinubu, Uzbekistani President Shavkat Mirziyoyev leh Ugandan Vice President Jessica Alupo te an tel dawn bawk.
Ram hruaitute bakah hian UN Secretary-General António Guterres-a pawhin a chhim dawn a ni.
Inrinni atanga inkhawmpui tan hma hian Prime Minister Modi-a chuan Zirtawpniah New Delhi-ah BRICS Business Forum a hmanpui hmasa dawn a. Hetah hian China, Russia, Brazil, UAE leh BRICS ram dang atanga sumdawn hotu lawkte an tel beisei a ni.
Commerce & Industry Minister Piyush Goyal-a leh External Affairs Minister S Jaishankar-a te pawh he hunah hian an tel dawn a. Lo neih, sumdawnna, investment, mamawh inpekna leh digital economy te an sawiho dawn a ni
Tun tum summit-ah hian Chinese sumdawng palai thahnem tak tel tura ngaih a ni a. An zingah hian CNPC Chairman Houliang Dai, ICBC Chairman Lin Liao leh China COSCO Shipping Corporation Chairman Min Wan te pawh tel tura rin an ni a. Huawei Technologies leh Alibaba Group-a hotu liante pawh an tel beisei ani bawk.
BRICS ram dang atang pawhin sumdawng hotu lian tel tur an awm nual a. Embraer CEO leh President Francisco Gomes Neto, Vale CEO leh President Gustavo Pimenta, Naspers CEO Phuthi Mahanyele-Dabengwa, Russian Railways CEO leh Chairman Oleg Belozerov leh Sberbank First Deputy Chairman Alexander Vedyakhin te pawh an tel ang.
Summit thlen tur avang hian Delhi-ah chuan venhimna khauh taka kalpui a ni a. Thlawhna tumhmun, khualbuk leh Bharat Mandapam te chu thuah tam taka ven a ni.
BRICS hi kum 2006-a Brazil, Russia, India leh China ten an din a ni a. Kum 2010-ah South Africa-in zawmin kum 2024 khan Egypt, Ethiopia, Iran leh UAE an tel ve leh a, a hnuah Indonesia a tel veleh ta a ni.