Round hmasa ber a hloh hnuah Lalrohlua Pautu chuan Dominic Laltanpuia a hneh a, Nilaini zan Mizoram Labour Link LPS Pro Fight-ah Orient Goldsmith Fighter of the Night lawmman a dawng.
Pro Fight vawi 12-na tan atanga a zan hnihnaah hian LPS Arena, Falkland, Aizawlah zan hmasa ber angin mipui tam lo deuh mah se eng emaw zat an pung khawm a, lightweight-ah Kanan Veng boxer Rohlua’n round hnihna tawp lam atangin North Vanlaiphai tlangval, Tanpuia a nawr hneh a, split decision-in a chak.
Thiamna pangngai tak hmangin veikhawr ve ve an intawng a, round hmasa berah Tanpuia langsar zawkin fuh takin a hnek fo a, round hnihna tir lam thlengin thui taka a vei lam a hnek chhuahin awmzia nei mah se Rohlua’n thahrui a nei tha zawk a, inhnaihchilhah hnek tha zawkin tha takin a nawr let.
Round hnihna tawp dawnah hneh takin a nuai a, round thumnaah pawh ngam takin a bei zui a. Kanan Veng tlangval hi judge pahnihin 29-28 ve vea an chaktir laiin judge pakhatin 29-28-in North Vanlaiphai boxer a chaktir ve thung a, Rohlua’n Nilaini zana inhnek zinga tha ber lawmman, Orient Goldsmith Fighter of the Night a dawng.
Light inhnek dangah Kolasib Khuangpuilam rawlthar, H Zomuanpuia’n thiamna nei zawk a nihna chhawrin Lalruatfela, Ainawn Veng lakah inhnek a thunun a, round tin la vekin unanimous decision-in a chak.
Churachandpur, Manipur atanga tel, Thangboi chuan Lalruatfela, Bungkawn Vengthar a hneh bawk a, thiamna nei sang lo mah se a ding lama a vai chhuah hmangin lehlam a tibuai a, round thum a la vek a ni.
Bantam-ah Thingsulthliah rawlthar, Lalrinsanga’n a ngila a vei leh ding a chhuah zawn hmangin Rothantluanga, Vairengte a hnek hneh a, round tin la veka a chak bakah Maubawk boxer Lalruatsanga’n hnek thiam zawk a nihna chhawrin Rinsailova, Thingsulthliah nena an inbeihna a pal tlang a, 30-27, 30-27, 29-28-in a chak bawk.
Inhnek dangah Lalhruaitluanga Khawlhring, Siaha a inlan loh avangin hahdam takin Englianthanga, Dawrpui a chak ve thung.
Fly-ah inhnek vawi li awmin Bawngkawn West rawlthar, Lalruatfela’n Lalpekzuala, Thuampui Vengthar a hnek tlu a, round hnihna minute hnih leh second 2-ah a knockout.
Inhnek dangah unanimous decision-in David Vanbiakthawnga, Nghalchawm chuan Lalremruata, Churachandpur, Manipur; Hmingdailova, Tawipui South-in Malsawmtluanga, Khawbung leh, Vanneihtluanga, Bawngkawnin Jacob Malsawmthanga, Dampui an hneh bawk a ni.
Welter-ah Phainuam boxer John Lalhunlawma’n Omega Sangboi Mate, Kawlbem lakah inhnek awpbet tluanin round thum a la vek a, inhmachhawn tur Francis Malsawmtluanga, Dinthar leh Lalawmpuia Chinzah, Lunglei Ramthar te chu mi mal thil avangin an inlan loh ve ve avangin chak awm lovin an inhnek hi nuai bo a ni.
Mizoram Labour Link LPS Pro Fight 2026
Zan 2-na: September 9, 2026 (Nilaini) RESULT
FLYWEIGHT
David Vanbiakthawnga (Nghalchawm) def Lalremruata (Churachandpur, Manipur) – Unanimous Decision (30-27, 29-28, 30-27)
Hmingdailova (Tawipui South) def Malsawmtluanga (Khawbung) – Unanimous Decision (30-27, 30-27, 30-27)
Vanneihtluanga (Bawngkawn) def Jacob Malsawmthanga (Dampui) – Unanimous Decision (30-27, 30-27, 29-28)
Lalruatfela (Bawngkawn West) def Lalpekzuala (Thuampui Vengthar) – Knockout (Round 1, Minute 2:02)
BANTAMWEIGHT
Lalrinsanga (Thingsulthliah) def Rothantluanga (Vairengte) – Unanimous Decision (30-27, 30-27, 30-27)
Lalruatsanga (Maubawk) def Rinsailova (Thingsulthliah) – Unanimous Decision (30-27, 30-27, 29-28)
Englianthanga (Dawrpui) def Lalhruaitluanga Khawlhring (Siaha)
- Walk Over
LIGHTWEIGHT
Thangboi (Churachandpur, Manipur) def Lalruatfela (Bungkawn Vengthar) – Unanimous Decision (30-27, 30-27, 30-27)
H Zomuanpuia (Kolasib Khuangpuilam) def Lalruatfela (Ainawn Veng) – Unanimous Decision (29-28, 30-27, 30-27)
Lalrohlua Pautu (Kanan Veng) def Dominic Laltanpuia (North Vanlaiphai) – Split Decision (28-29, 29-28, 29-28)
WELTERWEIGHT
Francis Malsawmtluanga (Dinthar) v Lalawmpuia Chinzah (Lunglei Ramthar) – Call Off (An inlan lo ve ve)
John Lalhunlawma (Phainuam) def Omega Sangboi Mate (Kawlbem) – Unanimous Decision (30-27, 30-27, 30-27)
Orient Goldsmith Fighter of the Night
- Lalrohlua Pautu (Kanan Veng)