India-a BRICS Leaders’ Summit chu Inrinni hian tan a ni dawn ta a, thawkho ramte inkarah hian US kaihhruaia Iran beihna kal mekah thlir dan inang lote pawh an awm a. Tehran leh Abu Dhabi chu buainaah hian ngaihdan inang lo langsar an ni.
Inrinni leh Pathiannia New Delhi-a summit hi US leh Israel tang dunin kum 2024 atanga BRICS memberni tan, Iran an beih atanga thla ruk hnua neih tur a ni a. He buaina avang hian khawvela tuialhthei sumdawnna kawng pawimawh, Strait of Hormuz khar niin tuialhthei man pawh barrel khat $100 chuang a kai phah mek.
Indona a chhuah tan atanga Iranian missile-in a kah fo, BRICS member ve tho, UAE chuan August thla atang khan Iran nena an insumdawnna leh suma an inzawmna a lo titawp vek tawh.
Chinese President Xi Jinping-a pawh kum sarih chhunga a vawi khat nan India tlawhin summit-ah hian a tel dawn a. Beijing hian BRICS hi dah pawimawhin summit thlengtu, India pawh a lama pawh hnaihna remchanga hman a tuma ngaih a ni.
Russian President Vladimir Putin, Iranian President Masoud Pezeshkian, South African President Cyril Ramaphosa, Egyptian President Abdel Fattah al-Sisi leh Indonesian President Prabowo Subianto te pawh an tel dawn a. UN Secretary-General Antonio Guterres-a’n a chhim bawk ang.
UAE chu Abu Dhabi Crown Prince Sheikh Khaled bin Mohamed bin Zayed Al Nahyan-a’n an ram ai a awh ang.
Kremlin thupuangtu, Dmitry Peskov-a chuan Thawhlehni khan UAE leh Iran ngaihdan inang lo chuan an pawlah ‘nghawng tha lo’ a neih thu a sawi a; mahse, an hruaituten an pawm ve ve theih tur thu an chhuah a beisei tih a sawi.
Brazil, Russia, India leh China te bul tanah hian South Africa tel belhin BRICS tih a ni a. A hnu lehah Egypt, Ethiopia, Iran, UAE leh Indonesia an telh belh leh bawk.
Saudi Arabia pawh member nghet la ni chiah lo mah se hruaitu lawk lote an tel dawn a. Foreign Minister Faisal bin Farhan Al Saud-a chu Delhi summit-ah hian a tel ang.
May thla khan BRICS ram foreign minister-te New Delhi-a intawh khawmnaah Iran leh UAE ngaihdan inang lo vangin thuchhuah intawm an lo siam thei lo tawh.
Hetih lai hian tun thla tir lama Shanghai Cooperation Organisation (SCO) summit-ah khan member-ten Iran buaina chungchangah tanna inang nei lote pawhin an pawm tlan theih thu chhuah a ni thung.
Indian Prime Minister Narendra Modi, Xi, Putin leh Pezeshkian leh hruaitu dangte chuan US-Israeli sipaiten Iran laka sipai chakna an hmang leh khawthlang ramten an hrekna an dem thu thuchhuah intawm an siam.
Tun thla tawpah hian Xi-a’n US a tlawh rin a ni a, Delhi-ah hian Putin-a nen an inbe dawn em tih hriat a ni lo va, Trump-a nen erawh Washington a tlawh hunah an inbia ang.