Mi tute nge an nih hriat loh ke pali nei lirtheia chuangten Manipur-a Imphal West district-ah, National Highway 2-a patrol-a kal Central Reserve Police Force (CRPF)-te an kap a, thi leh hliam erawh an awm lo tih police-in an sawi.
Police-te chuan he thil hi Ningani tlai dar 6.20 vela Khonghampat Laikol Leikai-a thleng niin an sawi a. 152 Battalion CRPF convoy hi kein Khonghampat leh Pheidinga inkara kawngpuia an patrol laiin a ni tih ans awi.
A kaptute hian venhim hna thawktute hi an pawngkah chiam hnuah hmar lama Sekmai khaw lam hawiin an tlanchhe zui nghal tih police chuan an sawi a. A bul vel an dapnaah AK-47 mu ruak pariat an chhar zui .
Thuneitute chuan a titute hi tute nge an nih an la hre chiang thei lo.
Silai a rik hnuah Imphal West district police chu Sekmai police nen a hmunah hian an kal nghal a, police station-ah thubuai an ziak lut nghal bawk.
Manipur-a chi leh chi inkara buaina hi May, 2023 atang khan Meitei leh Kuki inkarah chhuakin tunah erawh chuan hnam hrang hrang a kang kai tawh a. Meitei leh Kuki-Zo hnam hian an chenna chin chu an inluhpawh theih lohna turin an khar ve ve a, an buainaah hian mi 260 vel thi awm tawhin mi 60,000 chuangin an in leh lo an chhuahsan phah tawh.
Meitei hi a tlangpuiin Hindu an ni a, Imphal phaizawlah an cheng ber a. Kuki-te hi Kristian an ni deuh ber thung a, tlangrama cheng an ni tlangpui a. State sorkar chuan hnam hnihte chenna lai inrina bawrah buaina chhuah mai hlauhthawnawmna, buffer zone a awm tawh lo tih an sawi a, hmun ralti bik erawh an la chhinchhiah thung.
Kum khat dawn President’s Rule-a an awm hnuah February thla khan mipui thlan sorkar din leh tawh a ni a. Sorkara mawhphurhna chelh tur hian hnam lian ber pathuma mite an tel vek a ni.