LV Robert Lalengliana’n round hnihna laihawlah Gabriel Lalruatfela a hnek tlu a, Ningani zan Mizoram Labour Link LPS Pro Fight inhnek dangah Lalnunthara’n rang takin Lallawmzuala a knockout bawk.
LPS Arena, Falkland-ah a tir atanga round hnihna tir thlengin Hmunpui tlangval, Ruatfela’n na takin nawr mah se, Tuipui Ferry boxer Engliana’n a taksaah hneksakin a nawr let a, round hnihna minute khat leh second 34-ah a knockout.
Lightweight inhnekah hian Ruatfela’n na tak takin a hnek fuh fo va, round khatnaah a chungnung zawk. Mahse, round hnihnaah tha taka inveng chungin Engliana’n dik takin a dawm a, a nak hnuaiah vawi hnih a hnek zawn hnuah Ruatfela a che buai a, um zuiin a hmaia a hneksak hnua a pumah chiang takin a hnek zui a, Hmunpui boxer tluin a che zui thei ta lo va. Round hmasa ber a hloh hnuah Tuipui Ferry tlangval a kir leh a, Orient Goldsmith Fighter of the Night-a thlan a ni.
Light inhnek dangah Muallianpui boxer Lalnunthara’n a tir atangin hneh takin Lallawmzuala, Bethlehem Veng a nuai nghal a, round hmasa ber minute khat leh second 27-ah a knockout.
Inhnek dangah Churachandpur Manipur boxer Onminlen chuan tharum nei tha, S Beikhaizachhi, Chakhei, Siaha district lakah split decision-in hnehna a chang hram.
Inhnek fuh tlemna inkhelah hian a tir atangin Beikhaizachhi chuan panin hnek fuh tumin a bei ngawrh hle a, Onminlen chuan tlawh paha inveng chungin a hnek let a, judge pahnihin Churachandpur boxer hi round tinah an chaktir laiin pakhatin 29-28-in Chakhei tlangval a chaktir ve thung a ni.
Bantam-ah Chawnpui boxer John Lalrozawna’n round hnihna tawp dawnah Rohit, Zemabawk Kawn Veng a knockout bawk a, a tir atangin Rozawna’n a hnek hneh a, inveng chungin Rohit-a’n bei let mah se a dawng hnem hle a. Chawnpui tlangvalin inhnek a awpbet hneh telh telh a, round hnihna minute hnih leh second 45-ah inhnek tihtawp a ni.
Inhnek dangah beiseiawm takin round khatnaah C Ramnunpuia, Zemabawk East inlan mah se round hnihna atangin Lengte boxer N Lalbiakmawia a insiam tha a, round hnuhnung pahnih a lak hnuah unanimous decision-in a chak.
Hetiang deuh bawk hian Andy Lalruatfela, Thenzawl chuan round hmasa ber a lak hnuah harsatna a tawk a, Khuangthing boxer Malsawmdawngzela’n nawr letin round hnuhnung pahnih a la a, unanimous decision-in a chak a ni.
Fly-ah inhnek vawi li awmin Sialhawk rawlthar Michael Zosangliana’n boxing tha pangngai tak a lantir a, thiamna leh thil dangah Lalrinkima, New Vervek thununin unanimous decision-in a hneh a, tawnhriat nei lo ve ve inhnekah Lalhruaitluanga, Ramthar Veng) chuan Mesak Lalrinzuala, Sunhluchhip lakah round thum la vekin hnehna a chang bawk.
Vanhne boxer F Lalpekhlua’n C Lalnunhriata, Vathuampui a hnek hneh hle a, round hnihna minute khat leh second 13-ah technichal knockout-in a hneh.
Hetiang tho hian Kapzalawma, Vaikhawtlang chuan round khat khel tluan lovin Edenthar boxer Lallawmawma a hneh bawk a, round khatna tawp nan second 16 a la awm tihin technical knockout-in a chak a ni.
Welter-ah inhnek vawi hnih awmin ITI Veng boxer Zothansanga’n a ngila a hnek fuh thin chhawrin round hmasa ber leh hnuhnung ber a la a, Zohmangaiha, Samlukhai chuan a ding lam a vai chhuah thin hmangin round hnihna la mah se a chakpui zo lo a ni.
Inhnek hnuhnung berah Chhinga Vengthlang rawlthar, Francis Lalenrema’n Lalremruata, Falkland lakah chungnung takin a khel a, a vei leh ding ngil taka a chhuah zawn thin hmanga a tihbuai bakah ban sei zawk a nihna chhawrin dik takin a hnek fo a, round tin la vekin a chak a ni.