MNF President Zoramthanga chuan Chief Minister Lalduhoma’n kum 1986 Mizo Peace Accord chungchanga ‘tlar tinah ka tel ve’ a tih chu dawt lian tak a sawi tih sawiin, inremna thuthlung sign-na hmunah leh a inremna kawng hrang hrangah Lalduhoma a tel loh thu leh lan ropui a tum mai zawkah a puh.
Thawhtannia MNF pisa Hnam Runa thu a sawinaah Zoramthanga chuan kum 1986 June 30-a inremna an neih chu a chhuanawm hle a, Mizoram mipui tan chhinchhiahtlak leh pawimawh ber a ni a, India ram hruaitute leh khawvel ram dang hruaitute pawhin ropui an tiin an ngaih hlutsak hle tih a sawi.
Zoramthanga chuan an inremna chu anmahni beituten tun hma pawhin sawinepsak an tum thin a, mipuiin an awih duh lo a, an sim hman viau a, mah se, tun hnaiah Lalduhoma’n MNF tihchhiat theihna kawng awm chhun nia a hriat vangin a phawrh leh tih sawiin, “Pu Lalduhoma hian ‘inremna tlar tinah ka tel ve a ni’ a tih kha, a tel lohna zawng zawngah pawh lan ropui duhin tel angin a insawi vek a, kha tih lai khan Pu Lalduhoma kha sawi rik a ni ve lo hrim hrim,” a ti bawk.