Vahani Scholarship Trust chuan Class 12 leh a chung lam zirlai, zirna senso tumsak ngaite tan scholarship dilna an hawn thu Thawhtannia Aizawl Press Club-a thuthar thehdarhtute an kawmnaah an puang a, he ruahmanna kaltlang hian Mizoram atanga zirlai harsa 100 chuangin dilna hi thehlut se an duh thu an sawi.
Vahani Scholarship hotute tar lan danin, he scholarship hi mi mal leh ram hmasawnna tura zirlai harsa bikte chawikan duhna hnuaia buatsaih a ni a. India-a zirna sang leh thaa luh tum leh zir mek zirlai tlingte hnenah academic fee leh hostel fee a thlawna tumsak vek an ni dawn a ni.
Hostel leh zirna fee bakah hian laptop stipend, kum tin zinna senso (annual travel), internet fee, personal mentorship, internship support, career counselling leh skill building support te a thlawnin pek tel vek an ni bawk ang.
Scholarship dil thei turte chu Class 12 zirlai an ni tur a ni a, pawl 10 Board exam-ah a hniam berah 85% hmu phak leh chhungkaw lakluh Rs 3,00,000 aia tlem lakluh nei chhungkuate an ni tur a ni.
Dilna hi August 1, 2026 atang khan hawn lo ni tawhin, November 1, 2026 thleng dilna hi a thlawnin kalpui a ni dawn a ni.
Dil duhte chuan Vahani Scholarship official website www.vahanischolarship.com hmangin online-in dilna hi an thawh thei ang.