Aizawl: Home Minister K. Sapdanga chuan chief minister leh party president mawhphurhna kawp hi a thatna leh that lohna hrang hrang a awm thu sawiin, tun hmain kawp lohna kalphung enkawl tawh thin a nih hnuah tunah chuan kawp chhin a nih tur thu a sawi a, hei hi party leh sorkar tana tha ber tura rel chhuah a nih thu a sawi.
Thawhtanni ZPM pisa inkhawmah K. Sapdanga chuan hruaitu thar ruat chungchangah party chu a thukhawm zing hle tih sawiin, party kalphung danglamna pakhat chu leader an neih hi a nih rualin leader berin party hruaitu mawhphurhna a chelh ngei loh chu a fel tawk lo hle a ni tiin a sawi a. Sorkar leh party kalphung tluang zawka a kal theih nan chief minister leh president mawhphurhna kawp hi enchhin a ni dawn ta tih a sawi.
Sorkar leh kohhran inlaichinna chungchang sawi zuiin, home minister chuan kum 2023 inthlan pui hmachhawn a nih laia Kohhran leh mipui tawngtaina zar an zo thu leh ZPM enkawl dan inenna darthlalang fiah ber chu Kohhran a nih thu a sawi a. Kohhran mite thikthu a chhiat deuh pawhin ram leh hnam tana thahnemngaihna a nih avangin Pathian lung tiawi zawnga sorkarna leh party enkawl zui a nih chhung chuan mipui leh Kohhran thlawpna an dawn zui zel a rin thu a sawi bawk.
Thalaite duhtui tawhzia leh kum 2028-a general election hmachhawn leh tur chungchang a sawi chhunzawm a. Kum hnih leh thla khat vel inbuatsaihna hun an la neih chhung hian party hruaitute leh worker-te tawngkam leh hnathawhin mark a hlawh chhuak dawn a ni tiin, thalaite namnul thiang loh thu leh sorkar leh party lungrual taka thawkrim a, ram rawngbawlna hun tha pe leh turin mipuite leh Pathian hnenah rinna nghat turin party mipui a chah a ni.