Aizawl: Lawngtlai College Venga ruah sur avanga tuihawkin a lak avanga nunna chan, Ruby Lalrinsiami (kum 6) chhungte chu sorkar chuan Thawhtanni khan Lawngtlai Bawrhsap Donny Lalruatsanga kaltlangin ralna Rs nuai 4 a hlan.
Chawlhkar kalta Zirtawpni tlaia vanduaithlak taka nunna chan Ruby Lalrinsiami hi B. Lalbawiliana fanu a ni a. Thawhtanni khan Lawngtlai District Bawrhsap Donny Lalruatsanga chuan nunna chantu chhungte hnenah sorkar ralna sum hi a hlan chhawng a ni.
Lawngtlai Bawrhsap chuan sorkar leh a mi mal ang pawha he thil thleng avanga an tawrhpui takzet thu sawiin, chhiatna a thlen rual hian District Disaster Management Authority (DDMA) chuan a tihtheih ang angte a bawhzui nghal thu a sawi bawk.
Tuihawk lak avanga thi Ruby Lalrinsiami hi Zirtawpni tlailam ruah sur nasa tak karah a thiannu nen dawra thil lei tura an kalna lamah tuihawk luankawrah chesual palhin, metre 300 vela thui tuihawk hian a len a ni. Chhan hman a nih tak loh avangin a tuk Inrinni khan Lawngtlai College Veng thlanmualah vuiliam a lo ni ta a ni.