Fur ruah chuan Inrinni atang hian India a chhuahsan tan a rinawm niin Indian Meteorological Department (IMD) chuan Thawhtanni khan a sawi a, fur liam mai tur karah hian lo neihna state lian tak takte chuan ruah an dawng tlem a, ni tlem sur hun la awm mah se an dawn thin zat an dawng phak dawn lo niin a lang.
Pathianni thleng khan ram puma kumin fura ruah sur hian a sur thin zat pangngai a phak lohna chu 15% a a ni a, chhim lam, khawchhak leh hmarchhakah a phak lo nasa zual a. Tuna sur zat la sur lo, sur tling lo ngei tur zingah Punjab, Haryana, Rajasthan, Bihar, Karnataka, Kerala, Telangana, Andhra Pradesh, Tamil Nadu, Arunachal Pradesh leh Meghalaya an tel.
Fur hi Rajasthan khawthlang lam atangin Inrinni atangin a tawlh chhuak dawn a, a nih dan thin tlangpui aia ni hnihin a chhuak tlai dawn a. Nikum phei kha chuan September 14-ah ram a chhuahsan tan tawh zawk a ni.
Ruah hân tan dawn mah se IMD thuneitute chuan tun kar chhungin khawthlang, hmarthlang leh chhim lamah ruah a la sur nasa dawn tih an sawi a. Skymet Vice President Mahesh Palawat-a pawhin fur hi kar tawp atangin a kian tan a beiseiawm tih as awi ve bawk a, “Pathiannia kiang tan turin kan hmu lawk a, hemi hma hian hmun eng emaw zatah chuan ruah a sur erawh a la rinawm,” a ti bawk.
Skymet hian September thla pum pawh hian chhim lama Tamil Nadu, Puducherry leh Karaikal-ah ruah a sur a rinawm niin ans awi bawk.
Kumin hian India-ah fur a na har hle a, June thlaah phei kha chuan a sur thin zat a phak lohna chu 40% zet a ni a, July-ah sur tam deuhvin thla a tawp khan 13%-in a la phak lo tho va. August thla a tawpah pawh 14%-a phak lo lehin September thlaa tla tlem leh hret a, Pathianni thleng khan sur thin zat hi 15%-in a la phak lo a ni.
Ruah sur thin phak lohna hi chhim lamah a nasa zual a, 28% zetin a phak lo va, khawchhak leh hmarchhakin dawtin 25%-in a phak lo va. Ram lailiah 6% leh hmarthlangah 10%-in a phak lo bawk.
State zingah fur ruah ringa thlai ching tamna hmunah a phak lo nasa a. Sur hun tlem la awm chunga sur thin zat pha lo ngei tura ngaih zingah Punjab (-40%), Haryana (-23%), Rajasthan (-25%), Bihar (-35%), Karnataka (-29%), Kerala (-27%), Telangana (-20%), Andhra Pradesh (-43%), Tamil Nadu (-26%), Arunachal Pradesh (-42%) leh Meghalaya (-59%) te chu a langsar an ni.
August 31-a IMD-in September-a khaw awm dan thlir lawkna an tihchhuahah sur thin zat atanga chhutin 91% vel a sur dawn niin an lo sawi lawk tawh a. Chawlhkar hnih liam hnuah Skymet Weather-in thlirna dang tichhuakin 85% vel chauh a sur dawn niin an sawi thar bawk.