South Africa-a kawngpui pawimawh leh lun ber zinga lirthei pakhata aia tam chetsualna thlengah mi 21 an thi.
Thawhtanni khaw var hmaa N1 highway-a chetsualna thlengah hian Toyota minibus taxi pahnih leh Suzuki sport utility vehicle an tel niin police thupuangtu, Warrant Officer Christopher Spies-a chuan a sawi.
South Africa-a chhim ber province, Western Cape-ah hian ni hnih chhungin an rama lirtheia chetsualna lian ber pahnih a thleng a. Pathianni tuk khan Mpumalanga province-a Ermelo bula lirthei chesualah mi pariat an lo thi tawh bawk.
South Africa hi lirthei chesual tamna ram niin hetiang lamah hian hriat an hlawh hle.
Thawhtanni tuka chetsualna thleng hi N1 highway-a Cape Town khawchhak lam km 380 vela hla, Prince Albert leh Leeu-Gamka khaw inkarah a nih thu Road Traffic Management Corporation (RTMC) chuan a sawi.
Thi zat hi ‘Western Cape-a emergency service leh thuneituten an la buaipui chhunzawm zel avangin la danglam thei a ni’ tih road safety agency chuan a sawi bawk.
A hmunah hian mi 18 an thi nia sawi a ni a, mi dang pathum erawh damdawi ina lak an nih hnua thi niin mi 21 an tling ta tih Spies-a chuan a sawi a. Mi dang pali pawh an na hle tih a sawi.
South African transport ministry chuan nikum khan kawngpuia chetsualna thleng avang hian mi 11,500 dawn an thi niin a chhinchhiah.
Kum 2023 khan hmar lama Limpopo province-ah khualzin phur bus leh pawisa phur truck insu-ah mi 20 an lo thi tawh a, mi 60 velin hliam an tuar bawk.