Aizawl: Mizoram State Project Monitoring Committee (MSPMC) Inspection Team-te chuan Serchhip District chhunga NH 02 kawngpui siam mek, tha tawk lo leh tlo lo lutuk chu Thawhlehni khan a hmunah zir chiangin an endik.
Endiktute hian kawng chhiat zualna laite chu Satellite hmanga location chhinchhiahna Differential Global Positioning System (DGPS) leh Drone hmangtein an chhinchhiah a, kawng chhuat siamna Bituminous Concrete (BC) sample, pot hole hnawhna hmanruate leh Mixed Plant material sample-te chu uluk zawka endik turin an la nghal bawk.
Inspection team-te hian Serchhip leh Chhiahtlang by-pass road dinhmunte zir chiang nghalin, Serchhipa sorkar Quarters (General Pool of Accommodation) sak mek leh Bungtlanga contractor-te hmunhma (Hot Mix Plant)-te pawh an tlawh bawk.
He endikna hnathawh hi Serchhip District Administration leh PWD official-te chuan tawiawmin, Addl. DC Dorothy Muansangi leh SDO PWD Lalrinhlua Ralte te chuan a hmunah an lo hruai a ni.