Aizawl: Mizoram State AIDS Control Society (MSACS) chuan Thawhlehni khan Hotel Regency-ah thisen pek leh a kaihhnawih chungchang zirhona an buatsaih.
Orientation Training in Blood Transfusion Services-ah hian MSACS-a thisen pek lam buaipuitu te, Association for Voluntary Blood Donation (AVBD) hruaitu te, Food & Drugs Aministration hotu te, blood bank hrang hranga thawkte leh social worker-te an tel.
MSACS Project Director Dr Jane Rinsangi Ralte-in thisen pek dan kalphung leh HIV/AIDS chungchang sawifiahin, thisen pek atanga HIV leh natna tha lo dang inkai chhawn a nih loh nan thisen pe turte an fimkhur a ngaih thu a sawi a, “Mahni inrinhlelhna nei reng reng chuan thisen pek luih talh tum loh tur a ni a, thisen a thianghlim a, a him ngei a ni tih inhre chiangte chauhin thisen an pe tur a ni,” a ti.
Dr Jane Rinsangi Ralte chuan, natna eng emaw nei ru reng chunga nihna inzêp a, thisen pe luite chu mi dang hnena natna kai darhtu an nih theih thu sawiin, chutiang mite chu dan hmanga hrem theih an nih thu a sawi.
Project Director chuan, Mizoram chu India rama HIV hluar berna state a nih avangin thisen pekte uluk lehzuala endik a tul thu a sawi a, “Tlawmngaia thisen petute zingah pawh thisen dawn atanga HIV leh natna inkai chhawn theih dangte vei an awm theih avangin thisen petute kan thlan uluk lehzual a ngai a ni,” a ti.
Inkhawmah hian MSACS Joint Director Dr Lalnunhlima Khiangte-in ‘Transfusion – Transmissible Infection and Screening’ tih thupui a sawi a. Zoram Medical College and Hospital Blood Bank-a medical officer Dr ST Lalhriatpuii’n thisen pe thei chin leh pe thei lote chungchang te, thisen then dan chi hrang hrang a sawifiah a. Zawhna leh chhanna hun hman a ni bawk.