Mizoram State Chief Information Commissioner (CIC) John Neihlaia chuan Mizoram Universal Health Care Scheme (MUHCS) chungchanga Mizoram sorkar leh Synod Hospital inremna chungchang RTI Act hmanga J. Malsawmzuala’n a dilna chu September 23, 2026 aia tlai loah a man chawi lova pe chhuak turin MUHCS SPIO & finance officer a hriattir.
State Information Commission (SIC) chuan RTI dilna hi mipui scheme kalpui dan leh mipui sum hman dan hriat duhna a nih avangin mipui tana tangkai tak a ni tih a tar lang a. Third party, Synod Hospital ngaihdan lak a nih hnuah he inremna hi RTI Act hmanga pek chhuah chungchangah sawiselna an nei lo va; Gauhati High Court pawhin he inremna hi mipui sum leh mipui enkawlna tur sorkar scheme a nih avangin mipui hriat chianna kawngah mipui hamthatna a awm tih chiang takin a lantir a ni. Commission chuan thenkhatah information pek khapna dan awm mah se, mipui hamthatna a chungnun zawk avangin pek hi a tawk tiin thutlukna a siam.
SPIO & Finance Officer hian a man chawi lova document a pek tawh zawng zawng nen compliance report pawh Commission hnenah a thawn tur a ni bawk.
Tar lan tawh angin, SIC thutlukna siam hmasak chu Mizoram sorkarin Gauhati High Court-ah a khing let a, High Court hian third party ngaihdan lak a nih loh avangin leh appeal-na hmun tar lan tel a nih loh avangin thutlukna hmasa chu thiatin, dan ang taka ngaihtuah nawn leh tura a tih hnua SIC hian thutlukna thar hi a siam leh a ni.