Aizawl: Union Minister of State for Youth Affairs & Sports Raksha Nikhil Khadse chuan department hotute chu tual chhung mite tana tan la lehzual tur leh sorkar laipui scheme-te mipuiin an hlawkpui lehzual nan chak zawka hma la turin a chah.
Saitual district tlawh a, Thawhlehnia Saitual District DC Conference Hall-ah sorkar department hotute leh sports association aiawhte nen inkawmnaah he thu hi union minister hian a sawi a. Mizoram chu organic farming-ah a san thu sawiin, thei leh thlai tharte mumal taka sawngbawla ram danga thawn chhuah a nih theih chuan hlep tam tak a lak luh theih a beisei thu a sawi.
Sports Minister Lalnghinglova Hmar nena an inkawmna chungchang sawiin, naupangte theihna haichhuah a nih theih nan infiamna lam inrelbawlna tihhmasawn a tul thu a sawi a. Ruihhlo lak atanga thalaite an fihlim theih nan sorkar program ‘Mera Yuva Bharat’ (MY Bharat) kaltlanga ke pen a pawimawh thu a sawi bawk.
He hunah hian Saitual bawrhsap leh SP Vivek Kumar Maurya te chuan district chanchin, sorkar hmalakna leh ruihhlo an man zat te powerpoint presentation hmangin an tar lang.
Union minister hian Nilaini khan Saitual atangin biakhmuhtheihna (video conference) hmangin Kolasib DC Conference Hall-a Head of Office (HoO) te leh tlawmngai pawl aiawhte pawh a kawm bawk a ni.