Mizoram Youth Commission (MYC), Zalen News leh Lynchpinn-te tangkawpin an huaihawt, ‘School Connect 2026’ chawlhkar khat awh tur neih mekah Nilaini khan Chaltlang Higher Secondary School-ah MYC Chairman Malsawmzuala Ralte chuan khuallian niin a hmanpui.
Malsawmzuala Ralte chuan thu sawiin, sorkar hna inziak tling tur chuan ‘T-5’ – tumruhna, taimakna, thawhrimna, tei rei peihna leh time table mumal tak siama zawm tlat a pawimawh tih a sawi a, vanneih thil thua competitive exam tlin a theih tawh loh thu a sawi a. Sorkar hna chauh um lo va, private, corporate leh mahni kutkea intodelhte pawh sorkar hnathawkte anga en a pawimawh a, corporate-a thawkte en hniam lo tura rilru puthmang tihzau a tul tih a sawi bawk.
He career counseling programme hi September ni 14 atanga 18 thleng awh tur a ni a, state pawn atangin university leh institution 10 — Sharda University, Hindustan University, Aditya Group of Institutions, Parul University, Ganpat University, Graphic Era University, Dev Bhoomi Uttarakhand University, SRM University, Harsha Group of Institutions leh Global Reach-te an tel a ni.
Tualchhung atangin St. Joseph HSS, St. Anthony HSS, Govt. Republic HSS, Home Mission HSS, Govt. Chaltlang HSS, Greenland HSS, Ephraim HSS, Providence HSS, Boston HSS leh Living Water HSS te an tel bawk.
Kum 2019 atangin School Connect hi neih tan niin, hripui len laia khaihlak zawk tih loh chu kum tin neih a lo ni tawh a ni.