Aizawl: Sorkar hmalakna ‘Bana Kaih’ (Hand Holding) scheme hnuaia ranchaw atana vaimim chinna pilot project kalpui mekah, Animal Husbandry & Veterinary Minister C. Lalsawivunga chuan Ningani khan Vaphai khuaa vaimim chingtute hnenah vaimim nuaina khawl leh silpaulin hlanna inkhawm a chhim.
Vaphai Community Hall-a khawl leh hmanrua hlanna hun hman a nih hmain, Minister hian chawhma lamah Saikhumphaia Vaimim chinna hmunpui a lo tlawh hmasa a. Chawhnu lama inkhawmah Minister C. Lalsawivunga chuan Chief Minister Lalduhoma hmalakna hnuaiah kuthnathawktute tan department hrang hrang — Veterinary, Horticulture, Agriculture leh Rural Development-te tangruala hma lak a nih thu a sawi a. Mizoram chhunga kuthnathawktu zawng zawngte pawh damdawi leh chemical hmang lo va, ram leilung hang leh tha hmanga thei leh thlai hrisel ching tura ngenin, hmanrua leh khawl dawn te chu tangkai taka hmang turin a chah.
AH & Vety Department Animal Feed Plant hian kum tin Vaimim quintal 3,600 vel a mamawh a, he project atanga loneituten an thar chhuah te hian department kum khat mamawh a phuhruk theih an beisei a, Mizoram pum pui mamawh phuhruk tura thar chhuak tur erawh chuan nasa zuala hma lak chhunzawm a tul dawn tih a sawi bawk.
He huna tar lan danin, Hand Holding Scheme hnuaiah hian ranchaw tur Vaimim leh Bekang contract farming chu Saitual, Khawzawl leh Champhai district-a khaw hrang hrangah kum thum chhung atan Rs vbc 4.08 sengin kalpui mek a ni.
He pilot project hnuaiah hian district pathumah chhungkaw 530 awmin, Vaphai khua atang ringawt pawhin chhungkaw 114 ten Saikhumphai leileteh Vaimim tin 20,000 vel chingin, Rs nuai 100 hu vel thar chhuah an beisei a ni.