India chuan an ramin tuialhthei a mamawhna a san lai takin Bangladesh hnenah a phuhruk nan diesel thahnem tak a thawn.
India-Bangladesh Friendship Pipeline (IBFP) hmangin India hian Parbatipur Receiving Terminal Depot, Dinajpur atangin metric tonne 4,000 dawn, litre nuai 47 a thawn chu a thleng tawh a ni.
Diesel a thawnte hi pipeline hmanga a thawn vawi 72-na a ni a. Pathianni zing dar 9:00 atanga a thawn chu Thawhlehni khan a zo fel tih Dinajpur Parbatipur Rail Depot Operation Manager Md Robiul Alam-a’n a sawi.
Kum 2018-a ram pahnihten inremna an siam angin Bangladesh hian kum 15 chhungin diesel tonne maktaduai 2 vel lak luhna tur a pawm a. Pipeline hi March, 2023 khan hawn niin hemi hmang hian tonne 3,30,087 a la lut tawh.
IBFP hi Prime Minister Narendra Modi leh Prime Minister Sheikh Hasina-i ten March, 2023-a an hawn dun a ni a. A lumphum hi prime minister pahnihte bawkin September, 2018 khan an phum a. Numaligarh Refinery Limited chuan kum 2015 atang khan petroleum product-te chu Bangladesh-ah a thawn thin a. Pipeline hi India-in a thenawm ram nena energy pipeline a siam pahnihna a ni.
Power leh energy-a India-Bangladesh inkungkaihna hi an kara thil pawimawh tak a tling a. IBFP hi India leh Bangladesh inkara energy pipeline hmasa ber niin Dhaka-a High-Speed Diesel (HSD) Million Metric Ton Per Annum (MMTPA) khat thawnna tur a ni.
Kumin March thla khan Bangladesh hian Middle East buaina avangin tuialhtheiah harsatna lian tak a tawk a, pipeline hmang hian diesel metric tonne 17,000 thawn nghal a ni.
Bangladesh hian India atangin July thla khan diesel tonne 8,000 la lutin March thla khan tonne 17,000 a la lut a, April-ah tonne 25,000 leh May thlaah tonne 8,000 a la lut bawk.
August-ah pawh khan India hian Dhaka atangin petroleum product thawn belh tura ngenna a dawng leh bawk a ni.