Aizawl: Health Minister Lalrinpuii chuan Inrinni khan Chanmari YMA Hall-a Tuipuiral Zirlai Pawl (TZP) Freshers’ Social chu khuallian niin a hmanpui a, TZP kum 40 tlin lawmna puala buatsaih souvenir a tlangzarh nghal bawk.
He huna Khualzahawm, bialtu MLA Ramthanmawia pawhin Board exam-a distinction-a pass zirlai mi paruk hnenah MLA Award — laptop a hlan nghal a ni.
Lalrinpuii chuan thu sawiin Tuipuiral chu pi-pu hmun hlui tam tak leh tourism hipna tling — Fiara tui, |hasiama seno neihna leh Mizo tlang hmingthang tak tak awmna hmun a nih thu a sawi a. Tourism minister a nih laia hmalakna lo awm tawhte tunah par chhuak mek chu lawmawm a tih thu a sawi.
Minister a nih angin Tuipuiral chhunga PHC pali awm zinga pathum — Khawbung, Farkawn leh Sesih PHC-te a tlawh tawh thu sawiin, Khawbung PHC building sak thar pawh hawn thuai a nih tur thu a sawi a. Zirlaite chu HIV/AIDS laka inveng tur leh mahni invawng thianghlim tlat turin a fuih bawk.
Khualzahawm Ramthanmawia pawhin Tuipuiralin zirlai chawimawi tur an nei thin chu lawmawm a tih thu leh, TZP chu pawl zahawm leh bial tana tangkai an nih thu a sawi.
Inkhawmah hian TZP dintu C. Lalhluna, B. Lalthangliana leh TZP Ex-President Lalnunsanga te pawhin thu an sawi bawk.
Inkhawmah hian Board leh University exam hrang hranga top 10 ni pha mi 13-te hnenah chawimawina hlan niin, Mizo Award 2025 dawngtu B. Lalthangliana leh Mizo Idol 2025 (Khawbung) Immanuel Lalremruata te pawh chawimawina hlan an ni.
Chawhnuah MSACS atangin HIV/AIDS awareness campaign neih a ni a, a hmunah hian screening leh HIV/AIDS test-te pawh buatsaih nghal a ni.