Manchester United boss Michael Carrick-a chuan game hnih vel an khelh fuh loh avanga a hmakhua ngaihtuah nghal chiam mai chu thil atthlak tak a ni tih a sawi a. Hna chân chu thil hlauhthawnawm a nih loh thu a sawi.
Chawlhkar duhawm lo tak an hman zawhah Carrick-a naute hian Pathianni zan khan Fulham an luhchilh a, result hriat hman a ni lo.
Minute 23-na atanga mi 10-a khel, Manchester City laka anmahni khelmuala an tlawm hnuah Carabao Cup-ah Brighton an hneh lo leh bawk a. Kum 50 chhunga Old Trafford-a goal hniha hma hruai chunga chak ta zui hmasa ber an ni.
United tantute chuan kar laihawla an tlawmna hi an pawm dam thei lo tak hle a, an team au nawmnahin an duh lohna hla an sa hial.
Carrick-a chuan heng harsatna awm zui atang hian heng nawrnate hian a tihbuai lem loh thu a sawi a, he a rilru put hmang hi Fulham an hmachhawn hmaa chanchinbu mite a biaknaah pawh a sawi nawn leh.
Carrick-a chuan, “Club hi ka hria a, ka hna kalpui dan tur leh khelmual chhunga beisei a awm dan te, dinhmun sang ber thleng tura min duh dante ka hria a. Heng zawng zawng hi ka hrethiam vek,” a ti.
“Ka hma hun te, club neitute leh ka hna chelhin a daih rei dan tur chungchang hi ka ngaihtuahnaah a lang lo. Ka dinhmun atanga khatiang ngaihtuah chu thil atthlak a ni a, ka rilruah a awm lo hrim hrim,” a ti.
A sawi zelnaah, “Inkhel vawi hnih khat lek kan che fuh lo a, kan chhe vek tawh tihna a ni lo. Mi thenkhat tan chuan chhe ta veka ngaih kan nih pawhin kan tan chuan a ni lo,” a ti.
Manchester United hotu lian atangin Carrick-a dinhmun a derthawng anga sawi pakhat mah an awm lo a. Kum 45 mi enkawlna hnuaia season liam ta chawhnua inkhel vawi 17-a vawi 12 an chak kha hriain player tam tak chet that tawk lohnaah zawk an rilru an dah lian zawk a ni.
Tun hnaiah erawh vawi ruk atangin vawi hnih chauh an chak a, chu pawh Premier League-a kai thar, Ipswich leh Champions League-a Azerbaijan champion Sabah FK lakah a ni.
“Chhiatna tak tak pawh a ni lo. Khawvel tawpna tur pawh a ni hlei nem,” tiin Carrick chuan a sawi.
Old Trafford a luhchilh hnuah duhthusam angin thil a thleng vek lo tih Carrick-a chuan a pawm a, mi sawi aia nasain amah hian a sawi chhuak fo nghe nghe a ni.
“Rilru hlimna tak takte pawh a awm a, lungchhiatna pawh a awm a, a chang chuan lungchhiatna te reuh tê pawh a lian hluai thin a. Hei hi he club ropui tak hmachhawn dan leh a chhunga awm dan tur pakhat a ni. Ka rilru hi khawi dangah mah a awm ka duh lo,” a ti.
“Ka awmna tur hmun tha ber a ni, ruahman anga a kal loh chang pawhin ka rilru a nghet tlat a. Heng hunte hi zir tur tam tak zawng hmua chak zawka kan chhuah leh theihna hmun tha ber an ni,” a ti.