Mizoram Larsap General (Dr) Vijay Kumar Singh (Retd) chuan New Delhi-a SCOPE Convention Centre-a neih, The Institution of Engineers (India) buatsaih, ‘IEI Industry & Education Excellence Summit & Award 2026’ chu khuallian niin Pathianni khan a hmanpui a, India hmasawnna rahbi zawhah engineer-ten hmun pawimawh tak an chan thu leh ram hma lam hun hi an kutah a innghat tlat a ni tih a sawi.
‘Engineering India’s Global Footprint : Technology, Talent & Trust’ tih thupui hmanga buatsaih he summit-ah hian larsap chuan khawvel thiamna sang zelah ram hrang hrangte an inel mek thu sawiin, India ramin thiamna leh theihna a neihte tangkai taka chhawr a tul thu a sawi a. Engineer tam tak chher chhuah ringawt a tawk lo va, degree an dawn zatah ni lovin eng thiamna nge an ngaihtuah chhuah theih tih zawka teh tur a nih thu leh an thil dehchhuahte rintlak leh tehkhawng pha a nih thlengin ngaih pawimawh a tul tih a sawi.
Digital India, van sang boruak zirna, geospatial technology, defence engineering leh artificial intelligence te pawh tun lai thiamna pawimawh tak tak an nih thu a sawi bawk.
Larsap chuan tlangram chhengchhe tak hi engineer-te tana chona leh a taka thiamna lantirna hmun remchang a nih thu a sawi a. Mizorama hmasawnna ruhrel din turin tlangram chhengchhia leh sik leh sa laka him, tun lai thiamna hmanga tlo leh rintlak a nih a tul thu sawiin, ram changkang ‘Viksit Bharat @2047’ thlen theih nan engineer-te chu theihtawp chhuah turin a chah.
Summit buatsaihtu, Institution of Engineers (India) hi kum 1920-a din tawh niin, engineering peng 15 atangin corporate member nuai 2.6 chuang an awm mek a ni a. He hunah hian industry hotute, policy siamtute, zirmite leh engineer an tel a ni.