Aizawl: Mizoram Synod hnuaia Pastor bial hrang hrangah Pathianni khan Mizo Sunday School Union (MSSU) hnuaia Senior Department pual inkhawmpui hman a ni.
Bial thenkhatah chuan Inrinni zan atangin inkhawmpui hi an tan a, bial chhung Kohhran hrang hranga Senior Department te inchhiarna leh hmalakna tlangpui report leh Bial Sunday Secretary Report khaikhawmna ngaihthlak a ni a. Pathianni chawhma inkhawmah inkhawmpui thupui sermon ngaihthlak a ni.
Bial Sunday School Committee-te ruahmanna leh duh dan angin bial hrang hrangah inkhawmpui hi hman dan hrang hrang — intihsiakna te, Speaker sawma intawhkhawmnate leh speaker nei kher lova tualchhung inkhawm anga hman a ni.
Senior Department hi kum 1947-a Sunday School Committee-in nula leh tlangval Sande Sikul pawl puala zirlai hran neih rawtna a siam behchhanin kum 1954 khan vawikhatna atan din a ni a. Tun dinhmunah MSSU inchhiarna hnuhnung ber tarlan danin Senior Department-ah hian zirlai 34,132 leh zirtirtu 5,495 an awm mek a ni.