Hollywood star Jim Carrey pawh kum 64 mi ni ve tawh mahse, mala awm reng a tum bik lo a, ngawi renga hun rei tak a lo kawp Min Ah nen an innei tawh tih an sawi chiang ta.
An pahnih hian kum 2022 kumtir atang khan an inzui tana, vantlang hmuha inlan lo vang vangin, an thawm hriat zui tur pawh a awm lo hle. An inzui zel em tih pawh hriat a ni zui lo a, mahse tun hnai khan Cesar Awards semnaah France ramah hmuh dun an ni a, hetah hi chuan an lo innei fel tawh tih an nemnget.
Cesar Awards semnaah hian France tawngin Jim hian stage-ah thu a sawi a, hetah hian a nupui Min Ah chungchang chu sawi tam hlein, French tawng hian a fak mawlh mawlh a ni ber a, a fate pahnih Jane leh Jackson chungah amah an thlawp thinnaah lawmthu a sawi bawk.
Jim leh Ah te hi an inkar sawi rik a nih atang hian engmah sawichhuak ve lovin an awm char char a, vantlang hmuhah pawh an inlan dun ngai lo bawk. Hetih chhung hian ngawirengin damlai par erawh an tlan dun zel a, tunah chuan an innei tawh tih an sawi chiang ta a ni.
Min Ah hian pasal lo nei tawhin, January 2019 khan a pasal Ginger Gonzaga nena hmuh dun hnuhnun ber an ni a, hemi kum vek October thla hian an inthen leh thung.
Jim Carrey pawh hi Mellisa Worner nen kum 1987 atanga kum 1995 thleng khan inneiin, hemi hnu hian Lauren Holly nen kum 1996 khan innei lehin, a kum lehah an inthen leh a ni.