Mizo film lar leh hlawhtling tak, kum 2001-a tihchhuah Sensiari chu kum 25 hnuah Mizoram States AIDS Control Society (MSACS) hmalaknain part II siam a ni dawn.
Sensiari II siam a nih tur thu hi MSACS Project Director Dr. Jane Ralte-in ningani khan Aijal Club-ah a puang a. Kum 25 liamtaa Health department bultuma siam Sensiari chu MSACS bultumin HIV/AIDS do kawnga inzirtirna lam hawia chunzawma Sensiari II siam a nih tur thu a sawi.
Sensiari II ah hian Mizoram pawna film festival-ah te pawh ngaihhlut hlawh phak Mizo film te lo siam tawh Raymond Colney chu Director a ni dawn a. Mizo film industry-a hriathlawh tak tak – Tommy Rosangliana, Lalhmingchhuangi leh Louis Hauhnar te pawh Sensiari II ah hian kan hmu dawn a, zaithiam Rokhumbeu leh Sensiari OST-a aw thawhtu Henry K Thanzauva te pawh tel tura beisei a ni.
MSACS Project Director Dr. Jane Ralte chuan “Mizoramah HIV/AIDS a hluar zel a, India ramah kan sang fal hle a, national average let 15 zetin kan sang” a ti a. Mizorama HIV hrik inkaichhawnna tam ber chu mipat hmeichhiatna a nih thu leh fimkhur dan inzirtir nasat a tul thu a sawi.
Kum 2001-a Sensiari tihchhuah a nih hunlaia HIV inkaichhawnna tam ber chu ruihhlova inchiuna hriau thianghlimlo vang a nih thu Dr. Jane Ralte chuan sawiin, “Tunah erawh chuan mipat hmeichhiatna atangin kan inkai tam ber tawh a, inzirtirna thar kan mamawh hle” a ti a. “Entertainment kaltlanga zirtirna kan inpek theihna tura Sensiari II hi ruahman a ni” a ti bawk.
Sensiari II siam a nih tur thu puannaah hian Sensiari Director Sangzela Tlau hovin a changtute pawh an tel a ni.