Aizawl: Pachhunga University College (PUC) Mizo Department buatsaihin Thawhlehni khan Seminar Hall-ah ni hnih awh tur ‘Tunlai Thiamna-in Mizo Thu leh Hlaa Hnuhma A Neih Dan Zir Hona’ (Two Day International Seminar on Digital Literature & Social Media : Influence on Mizo Writings) neih tan a ni.
He seminar-ah hian tunlai thiamna hrang hrang Artificial Intelligence (AI), Facebook, Instagram, YouTube, leh X (Twitter) ten Mizo literature-a nghawng an neih dan zirho a ni.
Seminar hawnna inkhawm Dr. Enid H. Lalrammuani kaihhruaiah khual lian Dr. Lalhriatzuali Ralte chuan, khawvel thiamna lo thang zel chu do chi a nih loh thu leh lo hman tangkai thiam a pawimawh thu sawiin, AI lamah Mizo tawng dik leh tha zawk neih a nih theih nan data dah luh tam a ngai hle a, chumi atan chuan zirlaite pawhin tihtheih tam tak an neih thu a sawi.
Thupui sawi hawngtu Prof. Irene Lalruatkimi, Department of Mass Communication, Mizoram University chuan Mizo tawng humhalh a tul rualin tunlai khawvelah chuan ‘preservation to participation’ tia kal a tul tak zet thu a sawi a. Internet khawvelah Mizo tawng a tam thei ang ber dahluh a, data tam zawk neih tura tan lak a tul thu a sawi.
Dr. H. Laldinmawia leh PUC Principal Prof. H. Lalthanzara ten thu an sawi bawk.
Mizoram University bul tuma seminar buatsaihah hian tualchhung bakah ram pawn leh ram chhung hmun hrang hrang — Times of India Correspondent, Cloudera AI company (Washington, USA), University of Edinburgh, Punjab University, IIT Roorkee, Bangalore, Delhi, Aizawl Theological College, Mizoram Christian College, Mizoram University, leh Journalist-te atangin mithiam hrang hrang sawm an tel a ni.
He seminar hi Nilaini hian chhunzawm leh tur a ni.