- R. Lalhmangaiha, Bethlehem
‘Min enchhin rawh u’ tiin mipui khawngaihna an ngen ngawih ngawih a, kum 2023 inthlan dawn leh a hma lam zawng khan Pu Lalduhoma kaihruai ZPM party chuan an campaign auhla-ah thiam takin – ‘Kalphung thar, party sorkar ni lo, mipui sorkar kan kan din ang; ZPM Chief Minister chuan portfolio a nei ve lo ang a, a Minister chaklo deuhte a dawmkang ang; ZPM Chief Minister chuan party president a chelh kawp ve lo ang; VIP culture kan tibo ang; Designation plate kan tar ve lo ang; ZPM Chief Minister chuan Car pakhat bak a kawl ve lovang; CBI kan kolut ang; CM leh Minister-te motor a inzui duah duah tihtawp a ni ang; hnathawh thalo a awm ve lovang; ram dang leh state hrang hranga Zofate enkawltu tur Minister hran kan nei ang; ‘
‘ZPM sorkar hunah chuan kum 15 daih kawngpui siam a ni tawh ang; Thalaite tan Mizoram Development Bank kan din ang; Restricted Tender kan ti ve lo ang a, Contractor chauhin contract hna an thawk tawh ang; Keini chuan kan puk ve lo ang; Chhiah kan tipung ve lo ang; Ruihhlo ngaite enkawlna UNO hriat tham kan din ang; Khua/Veng tinah Development Committee kan din ang; Mizoram pawisa tel lovin State Capital thar kan siam ang a, Central-in min pek loh pawhin khawvel ram dangah kan dil ang a, Kristian Millionnaire rawngbawlna a ngaia a thlawna khawpui sa thei tur kan hria,’ tih leh thil dang tam tak, sawisen loh a awm.
Heng kan sawi tak au hla hmang hian tuna kan Chief Minister ni mek hi campaign lai khan a au nasa ber a. Tawngkam a thiamin a thusawi a awihawm bawk a. Chubakah ‘kalphung thar’ a kal turin an inzuar nasa a, political party awn lam nei lote pawhin ‘kalphung thar’ han ‘enchhin’ ve hrim hrim kha an duh avanga MLA pawh 27 lawih neia sorkar thei an ni.
Kal phung thar sorkar an tihah chuan sorkar term chanve tha zet Chief Minister leh Party President nih kawp loh min enchhin tir hnuah chuan kal hmasate ang thovin nih kawp an pawm leh ta tho a. Contractor hnathawk tha tam tak an awm teuh laiin Empanel Firm kum hnih khat lek chhunga lo pung ta hluai te, heng ho tana restricted tender a hlawma pek chhuah (blanket approval) lo ni ta te, langtlang sorkar kan beisei laia RTI hmanga thil dil chhuah harsat avanga court hial thlen a ngaihna sorkar a lo ni ta bawk.
16th Finance Commission-a Mizoram sum dawn tur a pun chhoh mek laia leiba a pung tual tual mai leh tualchhungah sum leng vak a tlem tial tial mai te, petrol leh diesel man atanga cess (chhiah) cheng vaibelchhe tam tak lirthei neitute atanga lak anih mek laia Mizoram hmun hrang hrang leh Mizoram chak lakluhna kawngpui chhe kum tluan reng maite leh ration buhfai man a let thawka tihpun leh chhiah/bill chihrang hrang rapthlak khawpa lo pung thur thur tate hian mipui phurrit min siam nasa hle mai.
ZPM hi kawng siam vil tura MLA/Minister-te duty tura a bika inruat sorkar Mizoramin kan neih hmasak ber a la ni a, nikum lawk khan Kawnpui to Khamrang kawng an zu in vil chhawk tlut tlut anih kha. Sorkar hmasaten an siam sa vek, Aizawl khawpui chhung kawng pawh AMC inthlan dawnah chawpchilh takin a siamthat, (repair) hna an thawk a, chung kawngte chuan fur khat pawh a daih lo, tunah chuan namen lovin an kawng siamte chu a chhe leh deuh vek tawh a ni tih chu mipuiin kan hria.
Chief Minister te hi an hnaah an tul teh reng nen Mizoram leilung pian tirh ata Chief Minister lo zawh buaipuia tel ka vawi khat hriatna a ni. Sorkar hnathawk leh Pensioner -te hrek zawnga Health Care Scheme kalpui luih tlat mai te, khaw thenkhat khawtlang nu leh pa bakah zirlaite rilru tina zawnga vantlang sikul dinhmun dah hniam te, research base-a kal inti si a research finding leh data mipui hmuh tur awm tlat si lote hi thu mak ka sawi nini theih loh chu a ni bawk. Minister-te hna thawh dan tur road map siam sa vek nia sawi, vawiin thlenga a tak hmuh tur awm si lo pawh Buhpâwl zinga hriau bo zawn ang vela hmuh tur awm lo a ni bawk.
Mipui sorkar kan din ang ti chung si a; mipui hnen thleng phak sum a van si zia te, mipui an ro tlawk tlawk laiin; Minister/MLA-te hamthatna hrang hrang a let thawk thawka a pun nasatziate hian sawi anga an awm lohzia leh mipui hmakhua an ngaih lohzia a tilang chiang a. A party ang pawhin hna awm zawng zawng General Headquarters level-ah an insem zawh deuh vek laiin; thingtlang lama an party hruaitute an khawrozia pawh an Unit-te mangang au aw a ni.
Campaign lai khan kawng engkimah tha ber leh a aia tha dang awm leh thei tawh lo tur khawpa Serafim tur angin an insawi a. An han sorkar ve meuh chuan sawi loh ang hlira awmin, sawi ang khan an awm ta reng reng lo. Enchhin sorkar hian bih thuak pawhin bihchian a dawllo tak zet a nih hi..