Ram 40 chuang atanga infiam mi punkhawmna tur, Commonwealth Cue Sports Championships 2026-ah India aiawhin Lalrina Renthlei inlan dawn.
Veer Savarkar Sports Complex, Ahmedabad, Gujarat-a inelna hi Nilaini khan hawn niin Ningani atangin an inkhel tan dawn a, Inrinni thleng awh tur a ni.
Championships-ah hian ram 40 chuang atangin mipa leh hmeichhia player 144 inlan tura beisei an ni a, inelna chi nga – Snooker, Billiards, Blackball, Heyball leh 10 Ball Pool khelh tur niin Tuikhuahtlang, Aizawla cheng, Lalrina hi India aiawhin 10 Ball Pool-ah a inlan dawn a ni.
Lalrina hi pool leh snooker-ah Mizoram No. 1 a lo ni fo tawh a, national championship hrang hrangah Mizoram aiawha lo chhuak fo tawh niin India aiawh pawhin kum 2024 khan Doha, Qatar-ah Asian 10 Ball Pool Championship 2024-ah a lo inlan tawh bawk.
Mizoram Snooker & Billiards Association (MSBA) chuan India aiawh tur player an nei hi an lawmpui hle a, result tha tak nei turin amah India team duhsakna an hlan tih an sawi.
Commonwealth Cue Sports Championships 2026 hi Billiards & Snooker Federation of India (BSFI)-in a thlen niin Apex Sports Promotion-in a huaihawt a ni ve thung a. Commonwealth Sport leh World Confederation of Billiards Sports (WCBS) hriatpuina leh pawmpuina hnuaia khelh tur a ni.
Mizoram atang hian Lalrina bakah MSBA Sr. Vice President ni mek, BSFI Vice President Vanlalnghaka pawh he cue sport inkhawmpuiah hian a kal a. Nilaini khan inelna tur hmun hi an thleng a ni.