Aizawl: Zirtawpni atanga neih tan, Mizoram Synod hnuaia inkhawmpui lian ber dawttu, Presbytery Inkhawmpui chu Pathianni zan khan a tiak.
Presbytery Inkhawmpuiah hian Mizoram hmun hrang hrangah Zitawpni khan Nomination Committee, Finance Committee leh Sub-Pastoral Committee an thu a, Kohhran Upa thlan tharte exam buatsaih a ni a, zan inkhawmah palai lawmna leh Pastor Bial Report ngaihthlak a ni.
Zirtawpni leh Inrinni khan Rorel Inkhawm neih a ni a, Presbytery thenkhat chu Inrinni chauha Rorel an awm bawk. Zan lamah vantlang Pathian biak inkhawm neih a ni a. Bial aiawha palai kalkhawmten Presbytery inenkawlna leh inrelbawlna khawih thil pawimawh chi hrang hrang an rel bakah, Synod lama thlen zui tur thil chi hrang hrang an rel bawk.
Pathianni chawhmaah Upa Nemngheh Inkhawm hman a ni a, chawhnuah Lalpa Zanriah Sakramen leh Upa thite sunna inkhawm neih a ni a, zanah Presbytery Moderator kalchhuakten Valedictory Sermon an sawi a ni.
Presbytery Inkhawmpui hmanpui hian Synod Puipate hmun hrang hrangah an chhuak a, Synod Moderator Rev. John Raldosanga chuan Tuichangral South Presbytery a hmanpui a ni.
Chief Minister, Upa Lalduhoma pawh Aizawl West II Presbytery Inkhawmpui, Luangmual West Kohhranah palaiin, Inrinnia rorel inkhawmah pawh a tel a ni.
Mizoram puma Presbytery hi 42 a awm a ni.