Aizawl: National Health Mission (NHM) hnuaia National Programme for Health Care of the Elderly (NPHCE) leh NP-NCD programme-te buatsaihin Thawhlehni chawhma dar 10:30 khan International Day of Older Persons chu State Senior Citizens Home, Ainawn-ah hman a ni.
He hun hi Home Welfare Officer PL. Lianmawia’n a kaihhruai a, sorkar hmalaknaa March 1, 1989-a din State Senior Citizens Home chungchang sawiin, din a nih atanga tun thlengin kum 60 chin chunglam baihvai leh chhawmdawl ngai mi 84 an enkawl tawh thu a sawi a. Tunah hian thawktu mi pakua awmin kum upa mi 10 enkawl mek an ni a, sorkarin mi 25 awm theihna tur in sa thar mekin chak taka hmalak a nih thu a sawi bawk.
State Nodal Officer Dr. Catherine Lalmuanawmi chuan International Day of Older Persons hi kum tin October 1-a hman thin a nih thu leh remchan zawkna avanga Thawhlehni-ah hman tak a nih thu a sawi fiah a, kum upate zahawmna leh hlutna sawiin hriselna tha tak nen rei tak dam turin duhsakna a hlan.
Inkhawmah hian Dr. Martin Chawngsailova’n a thlawna inentirna neih dan tur hriattur pawimawhte a hrilhfiah a, MUP Ainawn Secretary K. Laldawngliana pawhin kum upate ngaihpawimawh a nih avangin lawmthu a sawi bawk.
Programme hman zawh hian damdawi lam, mit, beng, TB, tha leh dietician mithiamten inentirna hi an buatsaih a, Senior Citizens Home-a awmte bakah MUP member mi 84 te hriselna endiksakin damdawi a thlawnin an sem a ni.