Congolese president hlui, Joseph Kabila chu an sorkar paih thlak tuma hel pawl tangrualte hruaitu thar atan ruat a ni.
Front for Refoundation of Nation (FRN) chuan Democratic Republic of Congo-a ‘mi pakhat rorelna’ tihtawp tumna ‘daltu sipai’ zawng zawng chu hmet mih an tum a, an tum tihhlawhtlin nan ‘eng hmanrua pawh, sipai chakna thlengin’ an hmang dawn tih an sawi.
Kabila hi kum khat kal ta khan ram tana pawi khawih nia puhin amah a awm lo chungin thi tura hrem a ni a, Thawhtannia helho hruaitu atana puan a nih takah hian ralthuam nena che pawlah a inhnamhnawih ngei tih a tilang chiang a. A hma chian M23 hel pawl nena inzawma puhna a pha thin.
Congolese sorkar chuan hel hruaitu thar chungchangah sawi an la nei lo.
Hel tangrualte hian DR Congo khawchhak lama khawpui lian ber, nikuma M23-in an lak, Goma-a Kabila chenna inah thuthar lakhawmtute an kawm.
M23 hruaitu, Sultani Makenga chu an movement thara hian Kabila-a deputy pali tur zingah a tel a. Mi dang pathumte hi AFC-M23 tangrual, nikuma DR Congo khawchhak lam ram leilung hausa lai latute atangin an ni dawn a ni.
Kabila hian tun hnai lawk khan thuchah tichhuakin Congolese mipuite chu an ram ‘chhanchhuak’ tura an chet chhuah a ngai tih a hrilh a, a hnuah sorkar paih thlak tum hotu atan ruat zui a ni.
Zirtawpni khan Kabila hian President Félix Tshisekedi-a sorkar chu nikuma a hnena rawtna a thlente ngai pawimawh lovah a puh a, heng zingah hian DR Congo khawchhaka buaina tihtawpna turte pawh a tel tih a sawi.
Sorkar chu danpui anga kal lo, eibar enkawl thiam lo leh venhimna lama tichhe em emah a puh a. Anmahni eptute dik lo taka manah a puh bawk.
Kum 55 mi, Kabila hi kum 2001 atanga January, 2019 thleng DR Congo a hruai a, inthlan sawi hlawh takah Tshisekedi-a a hneh lo a ni.
President hi hun rei tak vantlang hriatah a inlar zui lo va, tun hnai mai atangin amah thlaktute sorkar chu a sawisel thar nasa hle thung.
Helho thawhhona thar siam a nih lai mek hian an ram hi kum tam tak tharum thawhnain a tibuai tawh a. DR Congo khawchhak lamah hian hel pawl 100 chuang awmin chi leh chi intihbuaina leh thuneihna inchuhna, ram hausa lai inchuhna nen buai a tam hle.
Tshisekedi-a term hnihna hi kum 2028-a tawp tur a ni a; mahse, May thla khan buaina a tam avangin inthlan a awm thei lo mai thei tih a lo sawi tawh.