India-a Cockroach Janta Party (CJP) hruaitute chu lungawi loh lantirna leh nawrh huaihawtna hmun venhimna khauh tak luta an rama inthlan buaipuitu hotu bâng tura an au rual hnuah Thawhlehni chawhma khan man an ni hlawm.
Party dintu, Abhijeet Dipke-a chuan police-in Delhi-a hmun hriat hlawh tak, Jantar Mantar atanga Ashutosh Ranka leh Saurav Das an hruai lai video a tichhuak a ni.
Video-ah hian anni pahnih bakah mi dangte chuan police-in an dalna, barricade chu lawn liamin an au rual a, Indian hnam puanzar an vai bawk.
Prime Minister Narendra Modi-a sorkar eptu pawlte chuan tun hnaia Election Commission of India (ECI)-in electoral roll a ennawn chu an party hlawkpui theih turin an kalpui niin an puh a, lehlam chuan an pha thung.
Ni eng emaw zat chhung Chief Election Commissioner (CEC) Gyanesh Kumar-a bân phutin CJP bakah eptu political party-ten khawlai luahin khawpui nunphung a buai phah tawh.
Police chuan Delhi pumah venhimna khauh takin an kalpui a, nawrh huaihawtna hmunte pawh khuahkhirh ni mah se mipuiin an paltlang zel tho.
Thawhlehni tuk khan Dipke, Das leh Ranka hian Das leh Ranka ten Jantar Mantar an lut tih video an tar lang theuh va. “Lungawi lohna hi i dang thei lo vang,” tiin Dipke-a chuan X-ah a ziak.
Das-a chuan he hmun hi ‘an la leh ta’ tih a tar lang tel a, a hnu lawkah hren tura lak zui an ni a. Police hian khawiah nge an kalpui tih hriat a ni chiah lo.
Ranka pawhin a hnuah Instagram live broadcast-ah police bus chhungah hren ve dangte nen langin hlim takin an awm a, an hnungtawlh dawn lo tih a sawi.
Sorkar laipuia home ministry chuan Jantar Mantar leh hmun thenkhat dangte chu nawrh huaihawtna hmun atan hman a remchang tawh lo tih an lo puang tawh a. Thuneitute chuan hmun dang pathum siamin hetah hian phalna nei tan punkhawm theih tih an sawi.
He thutlukna siam hma hian CJP hian Delhi Police hotute hmuin Jantar Mantar-a muanawm taka nawrh huaihawt phalna an dil a, chhanna an hmuh loh chuan an kal zel dan tur an la sawi ang tih an puang bawk.
“Delhi police hmua Jantar Mantar-a kan punkhawm theih hun tur kan zawh hnu minute 30 lekah Jantar Mantar chu hetiang tihna atana hman theih a ni lo tih puan a ni,” tiin Ranka chuan X-ah a hmain a lo tar lang tawh.
CJP hruaitu lawkte hi tun hnaiah Delhi-ah an awm deuh vek a. Dipke ber erawh a pi a thih avangin Maharashtra-a an khuaah a haw rih a. Inrinnia nawrh an huaihawtah khan an hruaitu dangte nen man an ni a, a tukah chhuahin a haw nghal.
CJP hian Inrinni khan Jantar Mantar-ah hian punkhawm an tum a; mahse, thuneituten venhimna nasa taka tikhauhvin a hmun an thlen theih loh nan khawpui pum an veng a ni.
Metro station tam tak khar a ni a, rel tlan tihtawp niin police leh paramilitary force sipai sang tel an duty.
Kartawp chhung khan police-in mi sang tel man leh chhuah leh an nei a, heng zingah hian chanchinbu mite pawh an tel a. Video leh thlalak thenkhatah police-te hian hmeichhia telin mi thenkhat chu an hnuk a, tharum takmeuhvin bus-ah an nawr lut tih a lang.
Eptu party, Congress pawhin Thawhtanni khan bazar tamna, Connaught Place atangin khawpui lailia Supreme Court thleng kawng an zawh bawk.
Congress hian Supreme Court-ah hian ECI-in electoral roll a ennawna hming maktaduai tel a paih chungchang an thlen a ni.
Tar lan tawh thin angin electoral roll ennawna lungawi lohna hi The Indian Express-in hemi kaihhnawihah hian CEC Kumar-a’n election commissioner dang pahnihte lungrualpuina awm chiah lova thil a kalpui anga tar lan atangin a ni.