Aizawl: India hmarchhak state-te tihhmasawnna tura bank hrang hrang leh sorkar hotute inrawnkhawmna, ‘North East Bankers’ Conclave 3.0’ chu Thawhlehni khan Mizoram University Auditorium, Aizawlah ‘Fuelling the Growth Engine’ tih thupui hmangin buatsaih a ni.
He conclave-ah hian Union DoNER Minister Jyotiraditya M. Scindia chu khuallian niin, Chief Minister Lalduhoma’n a tawiawm a; RD Minister Prof. Lalnilawma, Chief Secretary Khilli Ram Meena, MDoNER Secretary Katikithala Srinivas, NEC Secretary Satinder Kumar Bhalla leh NEDFi CMD PVSLN Murty te bakah hmarchhak state hrang hrang aiawhte leh bank hotute an tel a ni.
Khuallian Scindia chuan hmarchhak bial chu thalai lehkha thiam leh leilung hausakna tamna a nih thu sawiin, hmasawnna puitlin tur chuan bank leh sorkar thawhhona a pawimawh thu a sawi.
Conclave 2.0 hmachhawp bawhzuina atangin bank branch thar 131 leh ATM 126 bun belh a nih tawh thu leh khaw 6,905-ah banking service hmantir a nih tawh thu a sawi a. Mipui tam zawkin banking service an chhawr theih nan bank branch din tura mihring chen zat mamawh tehfung chu mi 3,000 atangin mi 2,000-ah tihhniam a nih thu a sawi bawk.
Mizoram bikah Credit-Deposit (CD) Ratio chu zaa 67-a tihsan target siam a ni a, conclave session pali — Last Mile, Loans, Livelihoods, leh Lifelines atangin rawtna tha zawng zawng 40 duang chhuak tura chahin, hmasawnna chak zawk beisei a nih thu union minister hian a sawi a ni.
Chief Minister Lalduhoma pawhin thu sawiin, bank-te chu sum kawltu mai ni lova mihring dinchhuahna leh hmasawnna hmanrua an nih thu a sawi a. Mizoram chu loan rul tha tamna state (High Loan Recovery Rate) a nih angin bank-ten loan puktir lam uar se a duh thu a sawi.
Lalduhoma chuan Mizoram sorkar Flagship Scheme ‘Bana Kaih’ hnuaiah bank panga thawhpui an neih mek thu leh, sorkar leh bank-te inkara thawhhona tha a awm theihnan ‘One Department, One Bank’ ruahmanna kalpui a nih thu a sawi bawk.
Conclave hian chawhnu lamah session hrang hrang hmangin hmarchhak bial chhunga sumdawnna leh hmasawnna chak zawka kalpui dan tur an zirho a ni.