Aizawl: Ni thum awh tur ‘Mizoram Travel Fest 2026’ chu Thawhlehni khan Aijal Club-ah Tourism Minister Lalnghinglova Hmar chuan a hawng a, Mizoramah tourism chu hmuh theihin a thang mek tih a sawi.
Hawnna inkhawmah tourism minister chuan Mizoten hnam nunphung humhalh chunga khawtlang mipuite inunauna hmanga khualzin hip (community-based tourism) an kalpui a tul thu sawiin, hemi a puitlin theih nan hian tourism lama mithiamte, tour operator-te leh mipuite tanrual a pawimawh tih a sawi.
Lalnghinglova Hmar chuan khualzin hipna tur atana kut leh festival hrang hrang buatsaih thinte chuan a khaw mipuite tan eizawnna a siam thin tih a sawi a. Phuaibuang khaw miputen Tlaizawng par behchhanna kut an buatsaih thinte chu entirna tha tak a nih thu sawiin, Aizawl pawn lamah pawh tourism chu hlawhtling taka kalpui chhoh mek zel a nih thu a sawi a. Thingtlang hmunahte Mizo chaw dik tak leh hnam nunphung dik tak hmuh tur a awm avangin Aizawl pawnah tourism chu kalpui chhoh mek zel a ni a, Champhai-ah Hnahsin Kut leh Lunglei-ah Leitlangpui Music Festival-te pawh hlawhtling taka buatsaih an lo ni tawh tih a sawi.
Thiamna leh khawvel changkang chho zelah social media chu thil tangkai tak a nih avangin, ram mawina leh nunphung hlutnate pho chhuaka khualzin hip nan hman a tul thu a sawi a. Khualzinte chuan Mizoram mawina mai ni lovin a rama cheng mipuite nunphung hlutna leh ze mawi tak te an hmuhchhuah a pawimawh tel avangin mipuite zawng zawng tanrual a ngai a ni, a ti bawk.
Mizoram Travel Fest 2026 hawnna inkhawmah hian Tourism Department leh Association of Tour Operators Mizoram (ATOM) hotute bakah Mizoram University (MZU)-a Mass Communication leh tourism department zirlai thahnem tak an tel a, hawnna inkhawm zawh chawhnu lamah tourism tihmasawn dan tur thupui hrang hrang zirho chhunzawm a ni.