Mizoram sorkar in nasa takin khualzin hipna turin hma a la a, kan ram leilung luh a awlsam tawh miau avangin hnamdang khualzin pawh an rawn pung zel bawk. Keimahni lam kan lo insiamrem ve zung zung pawh a tul awm e.
Khualzin hipna turin Kut hrang hrang siam thin a ni a, tin kan hmun pawimawh hrang hrang tuaihnum leh siamthat zel a ni chho ta bawk. Heng hmasawnna leh remchannate hi a hlawkna teltu tur chu keimahni bawk kan ni a, kan lo inbuatsaih thiam ve zel pawh a tul hle.
Hnamdang lo lutte hmuh theih tur hian kan theihtawpa kan lo inbuatsaih ve a tul a, kan lan dan leh kan khawsak phung pawh kan lo siamrem a, biak nuam leh hawihhawm chhuah kawnga kan inzir pawh a tha a, tawng lama hmasawn tura mitin kan lo inzir ve pawh a tul ta viau.
Tun lai thiamna sang tawh takah hian khualzinte hian kan chetla lai engkim an la thei tawh a, khawvel hmuhah kan nunphung engkim an lak a, an entir theih tawh avangin lo inthiarfihlim ngawt theih lah a ni tawh hek lo.
Sorkar in nasa takin kan hmel lanna turin hma a la a, khawvel hmuha kan inphochhuah theihna tur kawng hrang hrangin ke a pen a, mipui lam pawhin theihtawpa kan lo tawiawm thiam a tul hle. Chutiang tur chuan mitin inzir ila, infinchhuah ila, a hlawkna teltu tur chu keimahni bawk kan ni tih i inhre thar fo ang u.