Aizawl: PHE Minister Prof. Lalnilawma chuan Nilaini khan 37 MLD Water Treatment Plant (Phase-III) hmun a tlawh a, Tlawng lui leh Setlak lui atanga tui pump-na lama chirh leh hnawl avanga harsatna awm mek dante a hmunah a enfiah.
Minister chuan fur a lo thlen a tui a nut thin avangin PHE dept. chuan harsatna lian tak an tawk thin tih sawiin, Tlawng-a intake leading channel gate chu chirhin a hnawh avangin tunah hian tui pump theih a nih rih loh thu leh Setlak lui atanga gravity hmanga lak a nih rih thu a sawi a. Harsatna hrang hrang avanga tui thianghlim sem hna a khaihlak thin avangin mipui hriatthiamna a ngen nghal bawk.
37 MLD Water Treatment Plant hi August ni 29, 2025-a UD&PA atanga PHE dept. hnenah hlan chhawn a ni a, September 2025 atanga enkawl tan niin tun thlengin tui million litres 3664.791 pump a ni tawh a. Amaherawhchu, chirh leh hnawl avangin November 2025 atang khan tui pump hna hi darkar 739 leh minute 47 zet a ti khaihlak tawh a, August ni 28, 2026 atang khan intake jackwell gate hi khar a nih rih avangin tun thlengin hawn a la ni lo. He plant enkawl tur hian mi 70 mamawh an nih laiin tunah hian mi 32 chauh an la awm a ni.
Nilaini vek khan PHE Minister Prof. Lalnilawma hian Zohnuai-Ropaiabawk kawng, Vaivakawna lei tlahniam mek chu a hmunah a enfiah a, tui pek chhuahna hmunpui tichhiaa mipuite tui pek hna a khaihlak loh nan hmalak dante a fiah bawk a ni.